പുഷ്പാംഗദന്റെ തൊപ്പിയും, വിചിത്രവീര്യന്റെ കിന്നരിയും ! വിമോചന സമരത്തിന്റെ ബാക്കിപത്രം ( ഭാഗം 2 )

ഇ.എം.എസ്. നമ്പൂതിരിപ്പാട് 

പാളേൽ കഞ്ഞി കുടിപ്പിക്കും, തമ്പ്രാനെന്നു വിളിപ്പിക്കും ! ( ഭാഗം  2 )


വിമോചന സമരത്തെ ഫലപ്രദമായി നേരിടാൻ കമ്മ്യൂണിസ്റ്റ് പാർട്ടിക്ക് കഴിഞ്ഞില്ല എന്ന് പറഞ്ഞല്ലോ? ആശാരിയുടെ കുഴപ്പവും തടിയുടെ വളവും എന്ന് പറഞ്ഞപോലെ ഭരണരംഗത്തും പിടിപ്പുകേട് വ്യക്തമായിത്തന്നെ കാണാമായിരുന്നു. മന്ത്രിമാരിൽ ഭൂരിപക്ഷവും അസാമാന്യ പ്രതിഭകളായിരുന്നു. തങ്ങൾക്കു ലഭിച്ച വകുപ്പുകളുമായി ബന്ധപ്പെട്ട വിഷയങ്ങളിൽ പല മന്ത്രിമാരും സ്പെഷ്യലിസ്റ്റുകൾ തന്നെയായിരുന്നു, തർക്കമില്ല. ഇ.എം.എസ്., വി.ആർ. കൃഷ്ണയ്യർ, ഡോ. എ.ആർ. മേനോൻ, പ്രൊഫ. ജോസഫ് മുണ്ടശേരി, അച്യുതമേനോൻ, റ്റി.വി. തോമസ്‌, കെ.ആർ. ഗൌരിയമ്മ; ഏതൊരു മന്ത്രിസഭക്കും അഭിമാനമായിരുന്നവർ. സഭയുടെ അധ്യക്ഷനാവട്ടെ നിയമ പണ്ഡിതനായിരുന്ന ആർ. ശങ്കരനാരായണൻ തമ്പി. നിഷ്പക്ഷനായ സ്പീക്കറെന്ന് എതിരാളികൾ പോലും തമ്പിസാറിനെ വിശേഷിപ്പിച്ചിട്ടുണ്ട്. അദ്ദേഹത്തിന്റെ അക്കാലത്തെ റൂളിങ്ങുകൾ പലതും അതിനുശേഷം വന്ന പല സ്പീക്കർമാറും പ്രയോഗിച്ചു വരാറുണ്ട്.

ഭരണ പരിഷ്കാരങ്ങളും നിയമ നിർമ്മാണങ്ങളും നടത്തുന്നതിനു അനാവശ്യമായ തിടുക്കം തുടക്കം മുതൽ തന്നെ മന്ത്രിസഭ സ്വീകരിച്ചുപോന്നു. പാർട്ടി തീരുമാനങ്ങൾ നടപ്പിലാക്കുന്ന ലാഘവബുദ്ധിയുടെ hang over നേതാക്കളെ വിട്ടു പോയിരുന്നില്ലായിരിക്കാം.

ആർ. ശങ്കരനാരായണൻ തമ്പി 

 ഉണ്ണാനും കുടിക്കാനും കല്യാണം കഴിക്കാനും കമ്മ്യൂണിസ്റ്റ് പാർട്ടിയോട് ആലോചിക്കാതെ പാടില്ലെന്ന് ചിന്തിക്കാനുള്ള അഹന്ത കുറെ നേതാക്കളെയെങ്കിലും ബാധിച്ചിരുന്നു. സ്വയംകൃതാനർത്ഥത്തിന് മറ്റുള്ളവരെ പഴിച്ചിട്ട് കാര്യമില്ലല്ലോ.

ഇതിനിടെ മറ്റൊരു കാര്യം ഞാൻ വ്യക്തമാക്കി കൊള്ളട്ടെ. കമ്മ്യൂണിസ്റ്റ് സർക്കാരിനെതിരെ കൃസ്ത്യൻ വൈദികർ സമരപരിപാടികളുമായി നീങ്ങുമ്പോൾ, അതിനെ നഖശിഖാന്തം എതിർത്ത ഒരു വൈദികൻ ഉണ്ടായിരുന്നു, യാക്കൊബാ സഭയിൽ. റവ. പൌലോസ് കോർ എപ്പിസ്കോപ്പാ. പെരുമ്പാവൂരിലെ ഒരു ക്രിസ്ത്യൻ മാനേജ്മെന്റ്   ഹൈസ്കൂളിൽ 32 വർഷക്കാലം ഹെഡ് മാസ്റ്റർ ആയിരുന്നു അദ്ദേഹം. സഭയുടെ അകത്തുനിന്നുള്ള സമ്മർദ്ദവും ഭീഷണിയും അദ്ദേഹത്തെ പിന്തിരിപ്പിച്ചില്ല. "ജനാധിപത്യത്തിന് നേരെയുള്ള പൈശാചികമായ ആക്രമണമാണീ പ്രാകൃതമായ സമരമെന്ന്" വളരെ ശക്തമായ ഭാഷയിൽ അദ്ദേഹം അപലപിച്ചു. ഈ വൈദികനേക്കാൾ, അദ്ദേഹത്തിന്റെ പ്രശസ്തനായ മകനെ വായനക്കാർ അറിയും, മുൻ അഡീഷണൽ ചീഫ് സെക്രട്ടറി ഡോ. ഡി. ബാബു പോൾ.

ഡോ. ഡി. ബാബു പോൾ 

ബ്രിട്ടനിലെ ആദ്യത്തെ ലേബർ പ്രധാനമന്ത്രിയായിരുന്ന James Ramsay MacDonald അധികാരം കിട്ടിയതിനുശേഷം, തൊഴിലാളികൾ അവരുടെ മർദ്ദകരെന്ന നിലയിൽ ശത്രുക്കളായി കണ്ടിരുന്ന കണ്‍സർവേറ്റീവ് പാർട്ടിയിലെ പ്രഭുക്കന്മാരുടേയും പ്രഭ്വിമാരുടെയും സഹവാസമാണ് കൂടുതൽ ഇഷ്ടപ്പെട്ടിരുന്നത് എന്നൊരു കഥയുണ്ട്.

സർ സി.പി.യുടെ ദിവാൻ ഭരണകാലത്ത് മിത്രങ്ങളായും പാദസേവകരായും നടന്നിരുന്ന ഉദ്യോഗസ്ഥപ്രമുഖരും ധനാഡ്ഡ്യരും, പട്ടം പ്രധാനമന്ത്രിയായപ്പോൾ അദ്ദേഹത്തിന്റെ പ്രതികാര ഖഡ്ഗം ഭയന്ന് കോണ്‍ഗ്രസ്സുകാരായിത്തീർന്നു എന്ന് കേട്ടിട്ടുണ്ട്. ഇങ്ങനെയുള്ള നപുംസുകങ്ങൾ എല്ലാ കാലത്തും ഉണ്ട്. ഈ പുതിയ അവതാരങ്ങൾക്ക് ചെങ്കൊടി പിടിക്കാനും ജാള്യം എതുമുണ്ടായില്ല. ആത്മാഭിമാനവും, പ്രസ്ഥാനത്തോട് കൂറുമുള്ള ഒരുപാട് സഖാക്കൾ പാർട്ടിയോട് അകലാനോ, അതല്ലെങ്കിൽ നിഷ്ക്രിയരാകാനോ ഇത് പ്രേരണ നല്കി.

പട്ടം താണുപിള്ള 

സി. അച്യുതമേനോൻ 

പല നേതാക്കന്മാരുടെയും ജീവിത ശൈലിക്കുതന്നെ പ്രകടമായ മാറ്റം വന്നുതുടങ്ങി. ഭക്ഷണത്തിൽ, വസ്ത്രധാരണത്തിൽ, യാത്രയിൽ എന്നുവേണ്ടാ ധർമ്മരാജായിലെ സി.വി.യുടെ കഥാപാത്രം പറയുന്നപോലെ " ഞങ്ങൾ ഭരിച്ചാലും ഭരും " എന്ന പെറ്റിബൂർഷ്വാ ചിന്താഗതി അവരിൽ വളർന്നു.

സി. രാജഗോപാലാചാരി 

മൌണ്ട് ബാറ്റണ്‍ പ്രഭു ഗവർണ്ണർ ജനറൽ സ്ഥാനത്തു നിന്ന് വിരമിച്ച ശേഷം സി. രാജഗോപാലാചാരിയാണ് ആ സ്ഥാനത്തേക്ക് നിയുക്തനായത്. സംസ്ഥാന പര്യടനങ്ങളുടെ ഭാഗമായി അദ്ദേഹം തിരു-കൊച്ചി സന്ദർശിക്കാനിടയായി. ഗവർണ്ണർ ജനറലിനെ സ്വീകരിക്കാൻ പട്ടം താണുപിള്ളയും സഹമന്ത്രിമാരും കിന്നരിത്തലപ്പാവും ഷെർവാണിയും ധരിച്ചാണ് വിമാനത്താവളത്തിൽ എത്തിയത്.

തിരുവിതാംകൂറിൽ ദിവാൻ പദവി അലങ്കരിച്ചിരുന്നവരുടെ ഔദ്യോഗിക വേഷവിധാനം ആയിരുന്നു ഇത്. സർ സി.പി. യുടെ ഫോട്ടോ കണ്ടിട്ടുള്ളവർക്ക് ഇത് പെട്ടെന്ന് ഓർമ്മവരും.

സർ സി.പി. രാമസ്വാമി 

മഹാത്മാ ഗാന്ധിയുടെ ശിഷ്യനും, രാജാജിയുടെ ആരാധകനുമായിരുന്ന ജി. രാമചന്ദ്രൻ പോലും, പഴയ തമിഴ് സംഗീത നാടകത്തിലെ രാജാപാർട്ടിന്റെ വേഷം കെട്ടാൻ വിസ്സമ്മതം പ്രകടിപ്പിച്ചില്ല.

വിമാനത്താവളത്തിൽ അണിനിരന്ന ഈ രാജാപാർട്ടുകളെ കണ്ടപ്പോൾ കോണ്‍ഗ്രസ്സുകാർക്ക്  ലജ്ജയും മറ്റുപൊതുജനങ്ങൾക്ക് അവജ്ഞയുമാണ്‌ ഉണ്ടായത്. ( ടി.എം. വർഗീസ്‌ തലപ്പാവ് കൈയ്യിൽ പിടിച്ചിരുന്നതേയുള്ളൂ എന്ന് പറഞ്ഞു കേട്ടിട്ടുണ്ട്.)

പുഷ്പാംഗദന്റെ തൊപ്പിയും, വിചിത്രവീര്യന്റെ കിന്നരിയെന്നുമാണ്‌ കുമ്പളത്ത്‌ ശങ്കുപ്പിള്ള ഇതിനെ വിശേഷിപ്പിച്ചത്.

സ്റേറ്റ് അതിഥിയായി വന്നിറങ്ങിയ ഗവർണ്ണർ ജനറൽ - ഈ പദവി ഏറ്റെടുക്കുന്നതിന് മുമ്പ് അദ്ദേഹം ബംഗാൾ ഗവർണ്ണർ ആയിരുന്നു എന്ന് കൂടി ഓര്ക്കണം - രാജാജിയുടെ വേഷമോ? പരുക്കൻ ഖദർ ജൂബ്ബായും, പരുക്കൻ ഒറ്റമുണ്ടും. ഒരു ഖദർ ഷാൾ പുതച്ചിരുന്നു, അതായിരുന്നു ഏക ആഡംബരം.

കാർട്ടൂണിസ്റ്റ് യേശുദാസൻ 

 കാർട്ടൂണിസ്റ്റ് യേശുദാസൻ ഒരിക്കൽ എന്നോട് പറഞ്ഞ ഒരു സംഭവം ഞാൻ ഓർക്കുന്നു. ജനയുഗം ദിനപ്പത്രത്തിലെ മുൻപേജ് പോക്കറ്റ് കാർട്ടൂണായ കിട്ടുമ്മാൻ, വാരികയിലെ " കുട്ടിച്ചട്ടമ്പി " ചന്തു തുടങ്ങി ചിത്ര രചനകളുമായി അദ്ദേഹം ജനയുഗത്തിൽ പ്രവൃത്തിയെടുക്കുകയായിരുന്നു. പത്രത്തിന്റെ ഏതോ ആവശ്യം പ്രമാണിച്ച്, സംസ്ഥാന സെക്രട്ടറിയറ്റ് മെമ്പറായിരുന്ന വി.എസ്. അച്ചുതാനന്ദനെ കാണാൻ തിരുവനന്തപുരത്തു ചെന്നു. വി.എസ്. VJT ഹാളിനടുത്തുള്ള കണ്ണനണ്ണാച്ചിയുടെ അരുണാ ലോഡ്ജിൽ ആയിരുന്നു താമസിച്ചിരുന്നത്. യേശുദാസൻ രാവിലെ അവിടെ ചെല്ലുമ്പോൾ വി.എസ്. മുറിയിലിരുന്ന് ബ്രേക്ക് ഫാസ്റ്റ് കഴിക്കുകയായിരുന്നു. ബ്രഡും ഓംലെറ്റും. ആ വിഭവങ്ങളല്ല യേശുദാസന് കൌതുകവും അതിലേറെ പരിഭവവും ഉണ്ടാക്കിയത്. അത് ഭക്ഷിക്കാൻ ഉപയോഗിച്ചുകൊണ്ടിരുന്ന ആയുധങ്ങൾ ആയിരുന്നു. ഫോർക്കും നൈഫും.
( തുടരും)

പാളേൽ കഞ്ഞി കുടിപ്പിക്കും; തമ്പ്രാനെന്നു വിളിപ്പിക്കും...! ( ഭാഗം -ഒന്ന് )

1957 ൽ കേരളത്തിൽ അധികാരത്തിൽ വന്ന കമ്മ്യൂണിസ്റ്റ് സർക്കാരിനെതിരെ മദ്ധ്യ തിരുവിതാംകൂറിൽ വിശേഷിച്ച് തിരുവല്ലാ താലൂക്കിലെ നിരണത്ത് മുഴങ്ങിക്കേട്ട മുദ്രാവാക്യമായിരുന്നു ഇത്. കാലങ്ങളായി അടിച്ചമർത്തപ്പെട്ട ഒരു വിഭാഗത്തിന്റെ പ്രതിനിധികളായ കമ്മ്യൂണിസ്റ്റുകാർ  ഭരണത്തിലെത്തിയത്തിലുള്ള അസഹിഷ്ണുതയുടെ തീവ്രത എത്രത്തോളമുണ്ടായിരുന്നു എന്ന് മനസ്സിലാക്കാൻ ഈ മുദ്രാവാക്യം വിളിച്ചവരുടെ ആവേശവും അത്യുത്സാഹം പരിശോധിച്ചാൽ മതിയാകും.

ഭൂപരിഷ്കരണനിയമം, വിദ്യാഭ്യാസനയം, ക്രമസമാധാനപ്രശ്നം, അഴിമതി എന്നിങ്ങനെ പലകാരണങ്ങൾ വിമോചനസമരത്തിന് വിഷയീഭവിച്ചു  എന്നാണ് ഒരു വിഭാഗം ചരിത്രകാരന്മാർ വിലയിരുത്തിയിട്ടുള്ളത്. ഇത് ഭാഗികമായി പോലും ശരിയല്ല എന്ന അഭിപ്രായമാണ് ഇതെഴുതുന്നയാളിനുള്ളത്. ഞാൻ അങ്ങനെ വിശ്വസിക്കാനുള്ള കാരണമിതാണ്: മേൽപ്പറഞ്ഞ മൂന്നു കാരണങ്ങളും സാധാരണക്കാരായ പൊതുജനങ്ങളെ പ്രത്യക്ഷമായോ പരോക്ഷമായോ ബാധിക്കുന്ന പ്രശ്നമായിരുന്നില്ല. ഈ പറഞ്ഞ കാര്യങ്ങൾ മാത്രം പറഞ്ഞു ബോധ്യപ്പെടുത്തി സാധാരണക്കാരെ തെരുവിലിറക്കുക എളുപ്പമായിരുന്നില്ല. പിന്നെന്ത് തന്ത്രമാണ് കമ്മ്യൂണിസ്റ്റ് വിരുദ്ധർ ഇതിനു വേണ്ടി പ്രയോഗിച്ചത്?

സംസ്ഥാനത്തെ എല്ലാ പ്രദേശങ്ങളിലും, ഏതെങ്കിലുമൊരു പ്രാദേശിക പ്രശ്നം ഊതിപ്പെരുപ്പിച്ച് കെട്ടുകഥകൾ ഉണ്ടാക്കി ജനങ്ങളെ ഭയവിഹ്വലരാക്കുന്ന തന്ത്രമായിരുന്നു അവർ പരീക്ഷിച്ചത്. കേന്ദ്രം ഭരിക്കുന്ന കോണ്ഗ്രസിന്റെ സംസ്ഥാന ഘടകം ഇതിനനുകൂലമായ നിലപാടായിരുന്നില്ല ആദ്യം സ്വീകരിച്ചിരുന്നത്. അതിന്റെ കാരണം, കേരളത്തിലെ ഗവണ്മേന്റിനോടോ ഭരിക്കുന്ന കമ്മ്യൂണിസ്റ്റ് പാർടിയോടോ ഉള്ള മതിപ്പോ ബഹുമാനമോ കൊണ്ടായിരുന്നില്ല. പ്രത്യുത ഈ സമരത്തോട് പണ്ഡിറ്റ്‌ നെഹ്രുവിന്റെ സമീപനം ഏതുതരത്തിലുള്ളതായിരിക്കും എന്ന സംശയം ആയിരുന്നു കാരണം. കൃസ്ത്യൻ മത മേലധ്യക്ഷന്മാരുടേയും നായർ സർവ്വീസ് സൊസൈറ്റിയുടേയും സമ്മർദ്ദത്തിനും ഭീഷണിക്കും കോണ്ഗ്രസിന് അവസാനം വഴങ്ങേണ്ടി വന്നു. ഭൂപരിഷ്കരണ നിയമം, ക്രമസമാധാനം, അഴിമതി, വിദ്യാഭ്യാസനയത്തിലെ വൈകല്യങ്ങൾ എന്നിവ ചൂണ്ടിക്കാട്ടിയാണ് അവർ സമരത്തിൽ അണി ചേർന്നത്.

ഈ. ജോണ്‍ ജേക്കബ്ബ് 

കൃസ്ത്യൻ മതമെലധ്യക്ഷൻമാരുടെയും നായർ സർവീസ് സൊസൈറ്റിയുടെയും സമ്മർദ്ദനത്തിനും ഭീഷണിക്കും അവസാനം കോണ്ഗ്രസ്സിന് വഴങ്ങേണ്ടി വന്നു. വിദ്യാഭ്യാസനയത്തിലെ വൈകല്യങ്ങൾ, ക്രമസമാധാന പ്രശ്നം, ഭൂപരിഷ്ക്കരണ നിയമത്തിലെ അപകടം തുടങ്ങിയ പ്രശ്നങ്ങൾ നിരത്തി, സംസ്ഥാനത്ത് അങ്ങിങ്ങ് നടന്നുകൊണ്ടിരുന്ന സമരങ്ങളെ കോണ്ഗ്രസ്സ് ഏകോപിപ്പിച്ചു.ക്രാന്തദർശിയായ മന്നത്തിന്റെ നേതൃത്വം കൂടിയായപ്പോൾ ഇതൊരു വൻ സർക്കാർ വിരുദ്ധ പ്രക്ഷോഭമായി വളർന്നു. കേരളം വ്യാപകമായി നടന്ന ഈ പ്രക്ഷോഭത്തിന്റെ ചരിത്രം വിശകലനം ചെയ്യാനല്ല ഞാൻ ഉദ്ദേശിക്കുന്നത്. കൃസ്ത്യൻ മതമേലധ്യക്ഷന്മാരും, സർവ്വീസ് സൊസൈറ്റിയും ഈ പ്രക്ഷോഭ കൊടുങ്കാറ്റിനുള്ള വിത്ത് വിതച്ചത് ഏതു തരത്തിലായിരുന്നു എന്ന് ചൂണ്ടിക്കാണിക്കുവാനാണ്.

നിരണം പഞ്ചായത്തും, കടപ്ര പഞ്ചായത്തിന്റെ പടിഞ്ഞാറൻ പ്രദേശവും നെൽക്കൃഷിക്ക് പ്രസിദ്ധമാണ്. ഈ പ്രദേശങ്ങളെ അപ്പർ കുട്ടനാട് എന്നാണു പറയുന്നത്. ഇ രണ്ടു പഞ്ചായത്തുകളും കൃസ്ത്യൻ ഭൂരിപക്ഷ പ്രദേശങ്ങളാണ്. രണ്ടോ മൂന്നോ നായർ കുടുംബങ്ങളും ഓരോ ബ്രാഹ്മണ-ക്ഷത്രിയ കുടുംബങ്ങളും ഒഴിച്ചാൽ സമ്പന്നരായ മറ്റു കർഷകർ കൃസ്ത്യാനികളായിരുന്നു. പ്രധാനമായും സിറിയൻ ഓർത്തഡോക്സ്‌ വിഭാഗക്കാർ. അവരുടെ വിഭാഗത്തിലെ ഏറ്റവും പ്രാമാണികരായ കർഷകരായിരുന്നു ഇലഞ്ഞിക്കൽ കുടുംബക്കാർ. മുൻ മന്ത്രിമാരായ ഈ.ജോണ്‍ ഫീലിപ്പോസും, ഈ. ജോണ്‍ ജേക്കബ്ബും ഈ കുടുംബത്തിലെ നാഥന്മാരായിരുന്നു.

ജോണ്‍ ജേക്കബ്ബ് മെർച്ചന്റ് നേവിയിൽ ഓഫീസ്സർ ആയിരുന്നു. ജോണ്‍ ഫീലിപ്പോസിന്റെ നിര്യാണത്തെ തുടർന്ന് ജോണ്‍ ജേക്കബ്ബ് കുടുംബ ഭരണവും കൃഷികാര്യങ്ങളും ഏറ്റെടുത്തു. ഇലഞ്ഞിക്കൽ തറവാട് സ്ഥിതി ചെയ്യുന്നത് നിരണം പഞ്ചായത്തിന്റെ പടിഞ്ഞാറേയറ്റത്ത് മങ്കോട്ടയിലാണ്. സഹോദരനെപ്പോലെ കോണ്ഗ്രസ് രാഷ്ട്രീയത്തിലും അദ്ദേഹം സജീവമായി. കുട്ടനാട് താലൂക്കിലെ നെൽകൃഷിക്കാരെ സംഘടിപ്പിച്ച് അദ്ദേഹം ഒരു യൂണിയൻ ഉണ്ടാക്കി. ചുരുങ്ങിയ കാലം കൊണ്ടുതന്നെ ആൾബലം കൊണ്ടും സമ്പത്ത് കൊണ്ടും അതൊരു പ്രബല സംഘടനയായിത്തീർന്നു. അങ്ങനെ തിരുവല്ലാ കുട്ടനാട് താലൂക്കുകളിലെ കിരീടമില്ലാത്ത രാജാവായി കഴിഞ്ഞു വരവേയാണ് ഐക്യ കേരളത്തിലെ ആദ്യ തെരഞ്ഞെടുപ്പു നടന്നതും  കമ്മ്യൂണിസ്റ്റ് പാർട്ടി അധികാരത്തിൽ വന്നതും.ഇലഞ്ഞിക്കൽ ബേബി, മങ്കോട്ട ബേബി, നിരണം ബേബി എന്നൊക്കെ അറിയപ്പെട്ടിരുന്ന അദ്ദേഹത്തിന് ഒട്ടുംതന്നെ ഉൾക്കൊള്ളാൻ കഴിയാതെ പോയ സംഭവ വികാസമായിരുന്നു അത്.

അദ്ദേഹത്തിന്റെ ഈ എതിർപ്പ് കമ്മ്യൂണിസ്റ്റ് തത്വ സംഹിതകളോടായിരുന്നില്ല എന്നാണ് എനിക്ക് തോന്നുന്നത്. പിന്നോക്ക വിഭാഗങ്ങൾക്ക് സർക്കാർ നല്കിക്കൊണ്ടിരുന്ന ആനുകൂല്യങ്ങളും സ്വാതന്ത്ര്യവും അദ്ദേഹത്തെ അലോസരപ്പെടുത്തിക്കാണും. അക്കാലത്ത് പിന്നോക്ക വിഭാഗക്കാർ ഇലഞ്ഞിക്കൽ പടിക്കൽ ചെന്നു നിന്ന്  " പാളേൽ കഞ്ഞി കുടിക്കില്ല, തമ്പ്രാനെന്നു വിളിക്കില്ല" എന്നു മുദ്രാവാക്യം വിളിക്കുമായിരുന്നു.  ഇത് എത്രത്തോളം ബേബിച്ചായന്റെ മനസ്സിന് സന്തോഷപ്രദമായ സംഭവമായിരിക്കും എന്നൂഹിക്കുക.

കമ്മ്യൂണിസ്റ്റ് ചെകുത്താന്മാർ ഭരണത്തിൽ ചുവടുറപ്പിച്ചു കഴിഞ്ഞാൽ പള്ളിയും അമ്പലവും ഇടിച്ചു നിരത്തി പാർട്ടിയാപ്പീസ് പണിയുമെന്നുള്ള വ്യാപകമായ പ്രചരണം കടപ്ര-നിരണം പ്രദേശത്ത് നിരണം ബേബിയുടെ ശിങ്കിടികളായ കമ്മ്യൂണിസ്റ്റ് വിരുദ്ധർ പ്രചരിപ്പിച്ചു. ഒരു ഞായറാഴ്ച കുർബ്ബാനക്കുശേഷം നിരണത്തെ ഒരു പള്ളിയിലെ വികാരിയച്ചൻ ഈ കാര്യങ്ങൾ വിശദീകരിച്ചിട്ട് തന്നാലാവുന്ന ഒരു ചെറിയ വെടി കൂടി പൊട്ടിച്ചു. ഈശ്വര വിശ്വാസികളെ തെരഞ്ഞു പിടിച്ച്, റഷ്യയിൽ നിന്നും ചൈനയിൽ നിന്നും വരുന്ന ചെമ്പട കമ്മ്യൂണിസ്റ്റ് പാർട്ടിയിലേക്ക് മാമൂദീസാ മുക്കും എന്നുള്ളതായിരുന്നു ആ പാതിരിയുടെ കണ്ടുപിടുത്തം. പള്ളിയും പട്ടക്കാരേയും നശിപ്പിക്കുകയും, ടെവാലയന്ഫ്ഗൽ കൊള്ളയടിക്കുകയും പോരാഞ്ഞിട്ട് കമ്മ്യൂണിസത്തിലേക്കുള്ള മാമോദിസായും. അറിയാതെ കുഞ്ഞാടുകൾ ചോദിച്ചു പോയി; അച്ചോ, നമ്മളെന്തോ ചെയ്യും...? വളരെ വാചാലമായിട്ടാണ് അച്ചൻ സംഭവിക്കാനിരിക്കുന്ന ആപത്ത് വിശദീകരിച്ചത്.

" സന്ധ്യ തിരിഞ്ഞ് ഓർക്കാപ്പുറത്തായിരിക്കും പത്തും പന്ത്രണ്ടും പേരുള്ള കൂട്ടമായിട്ടാണ് ഇവന്മാർ വരുന്നത്. ഭിത്തിയിൽ ദൈവപുത്രന്റെയോ മാതാവിന്റെയോ ഫോട്ടോയുണ്ടോ കഥ കഴിഞ്ഞു. അമ്മപെങ്ങന്മാരെന്നില്ല, പിടിച്ചുകെട്ടിയിട്ട് ക്രൂരമായി ദ്രോഹിക്കും. അതിനു ശേഷമാണ് മാമോദീസ. ഒരു ചുവന്ന തുണിക്കഷ്ണം കയ്യിൽ തന്നിട്ട്, വിപ്ലവം ജയിക്കട്ടെ എന്ന് വിളിച്ചു പറയാൻ. അതാണ്‌ അവന്മാരുടെ മാമോദീസ. ഇത്രപേരെ കമ്മ്യൂണിസത്തിൽ ചേർത്തു എന്നതിന്റെ കണക്ക് ചെമ്പട കമാണ്ടറെ ബോദ്ധ്യപ്പെടുത്തണം. വെറുതെ പറഞ്ഞാൽ അവർ വിശ്വസിക്കുകയില്ല. തെളിവ് കൊടുക്കണം. അതിനവർ സ്ത്രീകളെയാണെങ്കിൽ ഒരു മാറിടം മുറിച്ചെടുക്കും. പുരുഷന്മാരെയാനെങ്കിൽ മേൽച്ചുണ്ട്. വിവരവും വിദ്യാഭ്യാസവുമില്ലാത്ത ഒരാളുടെ പരിഭ്രമമല്ല, ഇംഗ്ലീഷ് സാഹിത്യത്തിലും ദൈവശാസ്ത്രത്തിലും ബിരുദമുള്ള ഒരു വൈദികന്റെ പ്രസംഗമാണ്.


ഇങ്ങനെയുള്ള ഒരു സാമൂഹ്യ ചുറ്റുപാട് നിലനില്ക്കുന്ന അവസരത്തിലാണ് നിരണം പാടത്ത് ഒരു കൊയ്ത്ത് പ്രശ്നം ഉടലെടുക്കുന്നത്. ബേബിച്ചായന്റെ ഉദയത്തോടുകൂടി നിരണം പാടത്ത് കൃഷിപ്പണിക്ക്, കൊയ്ത്തടക്കം INTUC കാർഡ്‌ ഉള്ളവരെ മാത്രമേ പണിക്ക് ഇറക്കുകയുള്ളൂ, ഞങ്ങളുടെ രണ്ടു വീടുകൾ ഒഴികെ.

മന്നത്ത് പത്മനാഭൻ 

INTUC കാർഡില്ലാത്തവരെയും കൊയ്ത്തിനിറക്കും എന്ന് പാർട്ടി പ്രാദേശിക നേതൃത്വം ഒരു തീരുമാനമെടുത്തു.കെ.കെ. ചന്ദ്രശേഖരൻപിള്ള വൈദ്യൻ, കെ. അപ്പുക്കുട്ടൻആദിശ്ശർ, അടിവാക്കൽ അനിയൻ എന്നിവരുടെ നേതൃത്വത്തിൽ പാർട്ടി അനുഭാവികളായ തൊഴിലാളികളെ പാടത്ത് സംഘടിപ്പിച്ചു. ചെന്നിത്തല, പാവുക്കര, വീയപുരം എന്നിവിടങ്ങളിൽ നിന്നുകൊണ്ടുവന്ന INTUC ക്കാരെ കണ്ടത്തിൽ ഇറക്കുകയില്ല എന്ന് വൈദ്യൻ ജോണ്‍ ജേക്കബ്ബിനോട്‌ പറഞ്ഞു. രംഗം വഷളാകുമെന്നു കണ്ടപ്പോൾ, ഇറക്കുമതി ചെയ്ത തൊഴിലാളികളെ തിരിച്ചയച്ചു.

പുഞ്ചയിൽ വെള്ളമുള്ളതുകൊണ്ട് മെതി സാധാരണ ഇലഞ്ഞിക്കലെ മുറ്റത്തുവെച്ചാണ്. പതവും തീർപ്പും അളക്കുമ്പോൾ ചുമട്ടുകൂലി കൂടി കണക്കാക്കി കൊടുക്കും. അതായിരുന്നു പതിവ്. പ്രശ്നങ്ങൾ ഉണ്ടാക്കരുത് എന്ന് കർശനനിർദ്ദേശം കൊടുത്തിട്ട് വൈദ്യനും ആദിശ്ശരും അവിടെനിന്നു പോയി.

കൊയ്ത്ത് കഴിഞ്ഞു. കറ്റ ചുമക്കേണ്ടെന്നും പാടത്തു തന്നെ മെതിച്ചാൽ മതിയെന്നും നിരണത്തെ നേതാവായ കെ.റ്റി.കൃഷ്ണൻകുട്ടി ( കൊമ്പങ്കേരി ) തൊഴിലാളികളോട് പറഞ്ഞു. എന്നാൽ മേതിക്കെണ്ടാ എന്നുപറഞ്ഞ് ജോണ്‍ ജേക്കബ്ബ് സ്ഥലം വിട്ടു.

എന്റെ അച്ഛൻ, പി.ജി. പുരുഷോത്തമൻ പിള്ള ( മുൻ ചെങ്ങന്നൂർ എം.എൽ.എ.) അന്ന് AISF ന്റെ ദേശീയ വൈസ് പ്രസിഡന്റായിരുന്നു. ഈ കൊയ്ത്ത് പ്രശ്നം നടക്കുമ്പോൾ അച്ഛൻ നാട്ടിലുണ്ട്. 

പി.ജി. പുരുഷോത്തമൻ പിള്ള 

പി.കെ. ചന്ദ്രാനന്ദൻ 

 ഈ വിവരം അറിഞ്ഞയുടൻ  പാർട്ടി തിരുവല്ല താലൂക്ക് സെക്രട്ടറിയായിരുന്ന പി.കെ.ചന്ദ്രാനന്ദനെ കണ്ട്‌ വിവരം ധരിപ്പിച്ചു. പ്രശ്നം വഷളാവുമെന്നും ഒരു പോലീസ് പിക്കറ്റ് ഏർപ്പെടുത്താൻ വേണ്ടത് ചെയ്യണമെന്നും ഉപദേശിച്ചു. അച്ഛൻ അടുത്ത ദിവസം തിരുവനന്തപുരത്തിനു മടങ്ങി. എം.എൻ.ഗോവിന്ദൻനായരായിരുന്നു പാർട്ടി സംസ്ഥാന സെക്രട്ടറി. എമ്മനെ കണ്ടപ്പോൾ നിരണത്തെ സംഭവ വികാസങ്ങൾ സൂചിപ്പിച്ചു. ജില്ലാ കമ്മറ്റിയോ, താലൂക്ക് കമ്മറ്റിയോ സംഭവം റിപ്പോർട്ട് ചെയ്യണം എന്നാണ് കമ്മ്യൂണിസ്റ്റ് പാർട്ടിയുടെ ചട്ടം. ദിവസങ്ങൾ ആറേഴു കഴിഞ്ഞിട്ടും ഈ വിവരങ്ങൾ ഒന്നും തന്നെ സംസ്ഥാന കമ്മറ്റിയെ ധരിപ്പിച്ചിരുന്നില്ല. അച്ഛന്റെ മുന്നറിയിപ്പ് പി.കെ.സി. ഗൌരവത്തിൽ എടുത്തില്ല എന്നാണല്ലോ ഇതിന്റെ സൂചന.

എം.എൻ. ഗോവിന്ദൻനായർ 

കൊയ്ത്ത് കഴിഞ്ഞപ്പോൾ തന്നെ നേരം രാത്രിയായി. തൊഴിലാളികൾ എല്ലാവരും കൂടി കൊമ്പങ്കേരി കൃഷ്ണൻകുട്ടിയുടെ വീട്ടിൽ കഴിഞ്ഞുകൂടി.

മെതിക്കാര്യം ചർച്ച ചെയ്യാൻ കെ.റ്റി. ഇലഞ്ഞിക്കലെത്തി. അദ്ദേഹം അവിടെയില്ല, എവിടെ പോയിരിക്കുകയാണ് എന്ന് വീട്ടുകാർക്ക് അറിയില്ല.

കമ്മ്യൂണിസ്റ്റ് പാർട്ടിക്ക് അന്ന് നിരണത്ത് പത്തോ പന്ത്രണ്ടോ ഫുൾ മെമ്പർമാർ മാത്രമാണുള്ളത്. അവരെയെല്ലാം കൂട്ടിയാണ് കൃഷ്ണൻകുട്ടി തിരികെ കൊമ്പങ്കേരിയിലെത്തിയത്.

ബൂർഷ്വാ മുതലാളിമാരുടെ മുന്നിൽ മുട്ടുമടക്കുകയില്ല, 100 പറ പുഞ്ച എഴുതിത്തന്നാലും മേലിൽ ഇലഞ്ഞിക്കൽ മുറ്റത്തേക്ക്  കറ്റ ചുമക്കുകയില്ല എന്നൊരു തീരുമാനവും പാർട്ടി നിരണം ബ്രാഞ്ച് സ്വീകരിച്ചു. ഈ തീരുമാനത്തിന്റെ മറുവശം - പുഞ്ചക്കണ്ടം ആവുമ്പോൾ എപ്പോഴും വെള്ളം കാണും, അവിടെയിട്ട് കറ്റ മെതിക്കാൻ കഴിയില്ല - ഒരു കർഷകനായ അടിവാക്കൽ അനിയൻ പോലും ( മുൻ നിരണം പഞ്ചായത്ത് പ്രസിഡന്റ്  എ.ജി.ഈപ്പൻ ) ഓർത്തില്ല. പക്ഷെ ബുദ്ധിപൂർവകമായ ഒരു നിർദ്ദേശം യോഗസമക്ഷം വെച്ചു. ആരും ഒറ്റക്കൊറ്റക്ക് പോകരുത്, ഒന്നിച്ച് ഒരു ജാഥയായി പോകണം. എന്നാൽ ഒരു ചെങ്കൊടികൂടിയിരിക്കട്ടെ എന്ന് തീരുമാനിച്ചു. കൃഷ്ണൻകുട്ടി ചെങ്കൊടിയുമായി മുന്നിൽ. നൂറിലധികം പേരുള്ള ആ ജാഥ ഇപ്പോൾ പഞ്ചായത്ത് ഓഫീസ് നില്ക്കുന്ന സ്ഥലത്ത് എത്തിയപ്പോഴേക്കും - കൊമ്പങ്കേരിയിൽ നിന്ന് കഷ്ടിച്ച് 2 KM.- കമ്മ്യൂണിസ്റ്റ് ഗുണ്ടകൾ ജാഥയായി ആക്രമിക്കാൻ വരുന്നു എന്നാരോ വ്യാപകമായി പ്രചരണം അഴിച്ചുവിട്ടു. പുഞ്ച വരമ്പത്ത് പുല്ലു ചെത്തിക്കൊണ്ടുനിന്ന ഒരു ക്രിസ്ത്യൻ സ്ത്രീ ഇത് കേട്ട് പേടിച്ചോടി, വരമ്പത്ത് കാലുതട്ടി, നെഞ്ചടിച്ച് നിലത്തു വീണു. അവരുടെ കൈയ്യിലിരുന്ന അരിവാളിന്റെ അറ്റംകൊണ്ട് മാറിടം മുറിഞ്ഞു.

യഥാർത്ഥത്തിൽ സംഭവിച്ചത് ഇതാണ്. കമ്മ്യൂണിസ്റ്റുകാർ ഒരു കൃസ്ത്യൻ യുവതിയുടെ മുല വെട്ടിക്കളഞ്ഞു എന്നായി പ്രചരണം. ഇടവകക്കാരെല്ലാം പള്ളിയിൽ ഒത്തുകൂടി, പ്രത്യാക്രമണത്തിനുള്ള പദ്ധതി ആസൂത്രണം ചെയ്തു.

ഈ സംഭവവികാസങ്ങൾ അറിഞ്ഞ് ജാഥാംഗങ്ങൾ കൊമ്പങ്കേരിക്ക് തന്നെ മടങ്ങി. ആക്രമികൾക്ക് ആ തുരുത്തിൽ നിഷ്പ്രയാസം എത്തിച്ചേരാൻ കഴിയുകയില്ല.

മറുഭാഗമാകട്ടെ മാരകായുധങ്ങളുമായി കണ്ണിൽക്കണ്ട പുലയരെ മുഴുവൻ - സ്ത്രീകളേയും കുട്ടികളേയും അടക്കം - ആക്രമിച്ചു. നിരണം, തോട്ടടി, തേവേരി എന്നിവിടങ്ങളിലെ കുടിലുകളെല്ലാം തീയിട്ടു. നിരണത്തുള്ള ഒരു കൊപ്രാക്കച്ചവടക്കാരൻ കുട്ടിമാപ്പിളയുടെ മകൻ തമ്പിയെ, പാർട്ടി അനുഭാവിയായ കൃസ്ത്യാനി എന്ന കാരണം കൊണ്ട്, കുത്തിക്കൊന്ന് പാടത്തെ ചെളിയിൽ താഴ്ത്തി. കടപ്ര പഞ്ചായത്തിലെ ഏക കമ്മ്യൂണിസ്റ്റായ ക്രുസ്ത്യാനിയായിരുന്നു പുളിമൂട്ടിലെ അവറാച്ചൻ. ( റിട്ട. PRF ഉദ്യോഗസ്ഥൻ )അദ്ദേഹം അന്ന് അവിഭക്ത കമ്മ്യൂണിസ്റ്റ് പാർട്ടിയുടെ തിരുവല്ല താലൂക്ക് കൌണ്‍സിൽ അംഗമായിരുന്നു. അവറാച്ചന്റെ ജ്യേഷ്ഠൻ ഒരു പോലീസ് ഉദ്യോഗസ്ഥനായിരുന്നിട്ടുകൂടി അവരുടെ വീട് ആക്രമിക്കപ്പെട്ടു. അദ്ദേഹം തിരുവല്ലാ പാർട്ടിയാപ്പീസിൽ ആയിരുന്നതുകൊണ്ടാണ്‌ രക്ഷപ്പെട്ടത്.

ലേഖകൻ 

 കൊമ്പങ്കേരിയിൽ കുടുങ്ങിപ്പോയ തൊഴിലാളികളെ ഒരാഴ്ച കഴിഞ്ഞ് വൈദ്യനും ആദിശ്ശരും കൂടി വളരെ സാഹസികമായി രക്ഷപ്പെടുത്തി പരുമലയിൽ കൊണ്ടുവന്ന് പാർപ്പിച്ചു. വ്യാപകമായ ഈ അക്രമം അടിച്ചമർത്താൻ, ഭരണത്തിൽ പാർട്ടി ആയിരുന്നിട്ടുകൂടി പോലീസ് തയ്യാറായില്ല. അവസാനം മുഖ്യമന്ത്രി ഈ.എം.എസ്. നേരിട്ടിടപെട്ടാണ് കടപ്രയിൽ ഒരു ഔട്ട്‌ പോസ്റ്റും, നിരണത്ത് പോലീസ് പിക്കറ്റും ഏർപ്പെടുത്തിയത്.

ഞങ്ങളുടെ പണിക്കാരായിരുന്ന ചാങ്ങപ്പുലയൻ, കുട്ടി, പാപ്പൻ, ചാങ്ങപ്പുലയന്റെ മക്കളായ കുഞ്ഞച്ചൻ, പാപ്പൻ പെണ്ണുങ്ങളും കുട്ടികളും മാസങ്ങളോളം ഞങ്ങളുടെ വീട്ടിലാണ് താമസിച്ചത്. ആ അജ്ഞാതവാസക്കാലത്ത് വീട്ടിൽവെച്ച് ഒരു വിവാഹവും നടക്കുകയുണ്ടായി. കുട്ടിയുടെ മകൾ പൊന്നമ്മയുടെ.

കമ്മ്യൂണിസ്റ്റുകാർ മുലവെട്ടിക്കളഞ്ഞ സംഭവം വ്യാപകമായ ഒരു പ്രചരണായുദ്ധമായി മനോരമ ഏറ്റെടുത്തു. കാറ്റനുസരിച്ച് തൂറ്റാൻ ബഹുസമർത്ഥനാണല്ലോ മന്നത്ത് പത്മനാഭൻ. സർക്കാരിന്റെ വിദ്യാഭ്യാസ നയത്തോട് അദ്ദേഹത്തിന് എതിർപ്പുമുണ്ടായിരുന്നു. മെത്രാന്മാരുടെ സമ്മർദ്ദം കൂടിയായപ്പോൾ അദ്ദേഹം സമരത്തിന്റെ നായകത്വം ഏറ്റെടുത്തു. ഒരു മധുര പ്രതികാരവും അദ്ദേഹത്തിന്റെ മനസ്സില് ഉണ്ടായിരുന്നു.

ചങ്ങനാശേരിൽ ഒരു കോളേജ് സ്ഥാപിക്കാനുള്ള എൻ.എസ്.എസ്സിന്റെ ശ്രമങ്ങളെ പരാജയപ്പെടുത്താൻ ചങ്ങനാശേരിയിലെ കൃസ്ത്യാനികൾ കഴിവത് പരിശ്രമിച്ചിരുന്നു. ബ്രിട്ടീഷ് ചക്രവർത്തിക്കുവരെ പരാതി അയച്ചിരുന്നു. ബ്രിട്ടനിലേക്ക് പരാതി അയച്ചത് സർ സി.പി.യെ പ്രകോപിപ്പിച്ചു. അന്ന് സി.പി. അനുവദിച്ചു കൊടുത്തതാണ് പെരുന്നയിലെ എൻ.എസ്.എസ്. ഹിന്ദു കോളേജ്. ( ഹിന്ദു കോളേജ് എന്നുപേരിടാനും കാരണമിതാണ്.)

ഇവന്മാരെക്കൊണ്ട് ഞാനിരിക്കുന്ന ഹംസരഥം വലിപ്പിക്കും - എന്ന് മന്നം ശപഥം ചെയ്തിരുന്നു. ഈ ശപഥ കഥ എന്നോട് പറഞ്ഞത് NSS  വിദ്യാലയങ്ങളുടെ റജിസ്ട്രാർ ആയിരുന്ന മാധവൻപിള്ള സാറാണ്. ( കടുവാ മാധവൻ പിള്ള എന്ന്  സുപ്രസിദ്ധനായ അദ്ദേഹം എന്റെ ചിറ്റമ്മയുടെ അച്ഛനാണ് ) മന്നത്തിന്റെ ചിരകാലസ്വപ്നം പൂവണിഞ്ഞു. NSS Head quartersനു മുമ്പിൽ നിന്ന് ആറു വെള്ളക്കുതിരകളെ പൂട്ടിയ തേരിൽ മന്നം. മെത്രാന്മാരും പള്ളീലച്ചന്മാരും കന്യാസ്ത്രീകളും തേര് തള്ളിക്കൊണ്ട് പിന്നിൽ. ജനാധിപത്യത്തെ അട്ടിമറിക്കാനുള്ള സമരത്തിന് തുടക്കം കുറിച്ചത് അങ്ങനെയാണ്.

ഒരു ചെറിയ തമാശ. ഒരു പോലീസ് വെടിവെയ്പ്പിൽ ഒരു ഗർഭിണി കൊല്ലപ്പെട്ടു. വെടിവെപ്പിൽ പ്രതിഷേധിച്ച് ആലപ്പുഴ ജില്ലയിലെ മാന്നാറിൽ ഒരു വമ്പിച്ച പൊതുയോഗം നടത്തി. സ്വാതന്ത്ര്യ സമരസേനാനിയും AICC അംഗവുമായിരുന്ന എൻ.എസ്.കൃഷ്ണപിള്ളയായിരുന്നു അദ്ധ്യക്ഷൻ. പ്രാദേശിക നേതാവായിരുന്നു സ്വാഗതപ്രസംഗകൻ.  " തിരുവനന്തപുരത്ത് ഒരു പാവപ്പെട്ട ഗർഭിണിയായ സ്ത്രീയെ...." ഇത്രത്തോളം ആയപ്പോൾ അധ്യക്ഷൻ കയറി ഇടപെട്ടു. " നിർത്തെടാ വിഡ്ഢീ, സ്ത്രീകളല്ലാതെ ആണുങ്ങളാണോടാ പിന്നെ ഗർഭം ധരിക്കുന്നത്....സ്വാഗതത്തിന്റെ ഗ്യാസുപോയി.

എൻ.എസ്. കൃഷ്ണപിള്ള 

ആ ഭരണകാലത്ത് രൂക്ഷമായ ഭക്ഷ്യ ക്ഷാമത്തെ തുടർന്ന് മക്രോണി എന്നു പേരുള്ള ഒരുതരം ചോളമാണ് റേഷൻ കടകളിൽ വിതരണം ചെയ്തിരുന്നത്. " ഭഗവാൻ  മക്രോണി " എന്നൊരു കഥാപ്രസംഗം ഒരു വിദ്വാൻ യോഗവേദികളിൽ അവതരിപ്പിച്ചു വന്നു. കേരളത്തിൽ ഭക്ഷ്യ ക്ഷാമം രൂക്ഷമായപ്പോൾ, കാറൽ മാർക്സ് മക്രോണിയായി അവതാരമെടുത്ത് കേരളത്തിലെ ജനങ്ങളുടെ വിശപ്പടക്കി....ഇതായിരുന്നു ഇതിവൃത്തം. അശ്ലീലവും ഒട്ടും കുറവായിരുന്നില്ല.

" ഞാൻ പ്രസംഗിക്കുന്ന സ്ഥലത്ത് ആ ഏഭ്യൻ ആ പൊട്ടപ്രസംഗവുമായി വന്നാൽ, അവന്റെ കരണക്കുറ്റിയടിച്ചു പൊട്ടിക്കും."  എൻ.എസ്.  കൃഷ്ണപിള്ള പരസ്യമായി തന്നെ പറഞ്ഞു. അതോടെ ആ ആഭാസത്തിന് തിരശീല വീണു.

ഈ സമരത്തെ ഫലപ്രദമായി നേരിടുവാനോ സത്യാവസ്ഥ ജനങ്ങളെ പറഞ്ഞു മനസ്സിലാക്കാനോ കമ്മ്യൂണിസ്റ്റ് പാർട്ടിക്ക് കഴിഞ്ഞില്ല എന്നത് പരമമായ ഒരു സത്യമാണ്. ( തുടരും )

വാഗീശ്വരിയുടെ സ്തനദ്വയം!

കെ.പി.എ.സിയുടെ നിങ്ങളെന്നെ കമ്മ്യൂണിസ്റ്റാക്കി എന്ന നാടകത്തിലെ പരമുപിള്ള ( കാമ്പിശേരി )

1950 ൽ കമ്മ്യൂണിസ്റ്റ് സഹായാത്രികാരോ അംഗങ്ങളോ ആയിരുന്ന അഞ്ചാറു ഉല്പതിഷ്നുക്കളായ ചെറുപ്പക്കാർ ചേർന്ന് ഒരു കലാ സാംസ്കാരിക സംഘടനക്ക് രൂപം കൊടുത്തു. ആ സംഘടനക്ക് കേരള പീപ്പിൾസ് ആർട്സ് ക്ലബ്ബ് എന്നവർ പേരുമിട്ടു. കേരള നാടക പ്രസ്ഥാനത്തിന്റെ രക്ത നക്ഷത്രമായി ശോഭിച്ചു നില്ക്കുന്ന കെ.പി.എ.സി. ആണത്.

ആ യുവാക്കൾ, ജി. ജനാർദ്ദനക്കുറുപ്പ്, ഒ. മാധവൻ, കാമ്പിശേരി കരുണാകരൻ, എൻ. രാജഗോപാലൻ നായർ, മലയാറ്റൂർ രാമകൃഷ്ണൻ തുടങ്ങിയവരായിരുന്നു. 1951 ൽ അവരുടെ ആദ്യത്തെ നാടകം അരങ്ങേറി. ജി. ജനാർദ്ദനക്കുറുപ്പ് രചിച്ച "എന്റെ മകനാണ് ശരി". ഈ നാടകം അമ്പേ പരാജയമായിരുന്നു. ( എന്റെ മകൻ നാണുവാശാരി എന്ന് ഈ നാടകത്തെ അന്നു ചെറുപ്പക്കാർ കളിയാക്കി പറയുമായിരുന്നു.)

തോപ്പിൽ ഭാസി ഒളിവിൽ കഴിയുമ്പോൾ സോമൻ എന്നു പേരുവെച്ച് എഴുതിയ നാടകമാണ് രണ്ടാമത് അരങ്ങത്ത് എത്തിച്ചത്. 195 2ൽ. നാടകം വാൻ വിജയമായിരുന്നു. കേരളത്തിന്റെ സാമൂഹ്യ-രാഷ്ട്രീയ മണ്ഡലങ്ങളിൽ മാറ്റത്തിന്റെ കാറ്റ് വിതച്ച പ്രസിദ്ധമായ ആ നാടകമാണ്             "നിങ്ങളെന്നെ കമ്മ്യൂണിസ്റ്റാക്കി".

നിരോധനം എടുത്തുകളഞ്ഞതിനുശേഷം പാർടി സമ്മേളനങ്ങളിൽ ഒഴിച്ചുകൂടാനാവാത്ത ഒരു പരിപാടിയായി മാറി കമ്മ്യൂണിസ്റ്റാക്കി നാടകം. 1957ൽ കമ്മ്യൂണിസ്റ്റ് ഗവണ്മെന്റ് അധികാരത്തിലെത്താൻ സമിതിയും ഈ നാടകവും നിർണ്ണായകമായ സ്വാധീനം ചെലുത്തിയിട്ടുണ്ടെന്നു നിസംശയം പറയാൻ കഴിയും.

തോപ്പിൽ ഭാസി 

 വളരെയധികം പ്രതിസന്ധികളും ഭീഷണികളും അതിജീവിച്ചാണ് കേരളത്തിൽ അങ്ങോളമിങ്ങോളം ഈ നാടകം അവതരിപ്പിച്ചത്. തിരുവിതാംകൂർ പോലീസിന്റെയും സ്റ്റേറ്റ് കോണ്‍ഗ്രസിന്റെയും ഭീഷണി പോരാഞ്ഞിട്ട് പ്രമാണിമാർ കള്ളുവാങ്ങിച്ചു കൊടുത്ത് നാടകം ചട്ടമ്പികളെക്കൊണ്ട് "കലക്കിക്കുന്ന" ഏർപ്പാട്. അങ്ങനെയുള്ള പരിപാടികൾ ഏറെ. കോടാകുളങ്ങര വാസുപിള്ളയും കെ. കേശവൻപോറ്റിയും ധൈര്യസമേതംതന്നെ ഇതിനെ നേരിടുകയും അക്കാലത്ത് പേരെടുത്ത പല ചട്ടമ്പികൾക്കും പൊതിരെ തല്ലുകിട്ടുകയും ചെയ്തു. നാടകം നേരിട്ട ആപത്തുകൾ സാധാരണ ജനങ്ങളിൽ സമിതിയെക്കുറിച്ചും കമ്മ്യൂണിസ്റ്റാക്കി നാടകത്തെക്കുറിച്ചും വർദ്ധിച്ച ആവേശം ഉണർത്താനാണ് സഹായിച്ചത്.

കമ്മ്യൂണിസ്റ്റാക്കിക്ക് ശേഷം വർഷങ്ങൾ കഴിഞ്ഞ് "ഭഗവാൻ കാലുമാറുന്നു" എന്ന നാടകവും വലിയ എതിർപ്പ് നേരിടേണ്ടിവന്നു. ഹിന്ദു മത മൌലികവാദികളായിരുന്നു ഈ നാടകത്തിനെതിരെ നായക്കോലം കെട്ടി കുരച്ചത്.

"കാലുമാറുന്നു" നാടകം മൂവാറ്റുപുഴയിൽ അവതരിപ്പിച്ചുകൊണ്ടിരിക്കുമ്പോൾ, അഭിനയിച്ചുകൊണ്ടിരുന്ന രാജമ്മചേച്ചിയുടെ നെറ്റിയിൽ ഏറുകൊണ്ട് ആറ് തുന്നൽ ഇടേണ്ടിവന്നു. നെറ്റിപൊട്ടി ചോരയൊലിച്ചിട്ടും, നാടകം പൂർത്തിയാക്കിയാണ് അവർ രംഗം വിട്ടത്. ആർ.എസ്.എസ്സിന്റെ ഈ ആഭാസങ്ങൾക്ക് മുഖ്യമന്ത്രി ആയിരുന്ന കരുണാകരന്റെ അനുഗ്രഹാശിസുകളും ഉണ്ടായിരുന്നു. പക്ഷെ കെ.പി.എ.സിയിലെ കലാകാരന്മാരുടെ നിശ്ചയദാർഡ്യ്യവും കേരളത്തിലെ ഇടതുപക്ഷ പ്രസ്ഥാനങ്ങളുടെ നിർലോഭമായ സഹകരണവും ഈ വെല്ലുവിളികളെ ശക്തമായി നേരിടുവാൻ സമിതിക്ക് കരുത്തുനല്കി.

കലകളിലൂടെ ജനങ്ങളുടെ മനസ്സിനെ കീഴടക്കാനാവുമെന്ന ചിന്ത, വിമോചന സമരകാലത്ത് കോണ്‍ഗ്രസ് ഒന്നു പരീക്ഷിക്കുകയുണ്ടായി. ഒരു കോമാളിയെ കാഥികൻ എന്നൊരു വേഷവും കെട്ടിച്ച്  "ഭഗവാൻ മക്രോണി" എന്നൊരു ആഭാസ കഥാപ്രസംഗം നാടുനീളെ അവതരിപ്പിച്ച് അവസാനം പരിഹാസ്യരായി പിൻവാങ്ങേണ്ടി വന്ന ചരിത്രം പഴമക്കാർ ഓർക്കുന്നുണ്ടാവും.

അഡ്വ. ജി. ജനാർദ്ദനക്കുറുപ്പ് 

അഡ്വ. എൻ. രാജഗോപാലൻനായർ 

 
 ഇന്ത്യയിലെ കമ്മ്യൂണിസ്റ്റ് പാർടികളുടെ വിപ്ലവത്തിന് ചൂടുപോരാ എന്ന് വിശ്വസിച്ച ചിലർ ചേർന്ന് ഒരു തീവ്ര ഇടതുപക്ഷ റിവഷനിസ്റ്റ് പ്രസ്ഥാനത്തിന് രൂപം നല്കുകയുണ്ടായല്ലോ? അതിലെ പ്രവർത്തകരെ നക്സലൈറ്റുകൾ എന്ന ഓമനപ്പേരിലാണ് അറിയപ്പെട്ടിരുന്നത്. കുറെ സാധുക്കളുടെ കഴുത്തുവെട്ടി, ഇന്ത്യയിൽ വിപ്ലവം സൃഷ്ടിക്കാൻ ശ്രമിച്ച അവരുടെ കൂട്ടത്തിലുള്ള ഒരു എക്സൻട്രിക്ക് ആയിരുന്നു സിവിക് ചന്ദ്രൻ. പ്രവർത്തിച്ച മേഖലകളിലൊന്നുംതന്നെ വ്യക്തമായ ഒരു നിലപാടും സ്വീകരിക്കാൻ കഴിഞ്ഞിട്ടില്ലാത്ത ഒരൈഡന്റിറ്റിയുമില്ലാത്ത ഒരു വ്യക്തിയാണയാൾ. കമ്മ്യൂണിസ്റ്റാക്കി നാടകത്തെ വിമർശിച്ച് - കാലമേറെക്കഴിഞ്ഞ് - കേരള ശബ്ദത്തിൽ അയാൾ "നിങ്ങളാരെ കമ്മ്യൂണിസ്റ്റാക്കി" എന്നൊരു ലേഖനം പ്രസിദ്ധീകരിച്ചു. ഇരു കമ്മ്യൂണിസ്റ്റ് പാർടിയിലേയും നേതാക്കളേയും, വിശേഷിച്ച് തോപ്പിൽ ഭാസിയെ വ്യക്തിപരമായി ആക്ഷേപിച്ചുകൊണ്ടുള്ള ലേഖനമായിരുന്നു അത്. അതിനൊരു മറുപടി എഴുതി ചന്ദ്രന്റെ യശസ്സ് വർദ്ധിപ്പിക്കേണ്ട എന്ന് കരുതിയാവണം ആരും തന്നെ പ്രതികരിക്കാൻ തയ്യാറായില്ല. തോപ്പിൽ ഭാസി അതിനൊരു അത്യുഗ്രൻ മറുപടി കൊടുത്തു. തലക്കെട്ട്, "നിന്റെ തന്തേ കമ്മ്യൂണിസ്റ്റാക്കി".

അമ്മിണിയമ്മ ( തോപ്പിൽ ഭാസിയുടെ ഭാര്യ ) പന്ന്യ്യൻ രവീന്ദ്രൻ കെ.പി.എ.സി.ലളിത എന്നിവരൊപ്പം.

മലയാറ്റൂർ രാമകൃഷ്ണൻ 

 തോപ്പിയുമായി ആശയ സംഘട്ടനത്തിനുള്ള ആയുധമില്ലാഞ്ഞിട്ടാണോ, ഇയാളുടെ നാലാംകിട സാഹിത്യം പ്രസിദ്ധീകരിച്ച് പത്രത്താളുകൾ മലീമസമാക്കണ്ട എന്നുകരുതി പ്രസിദ്ധീകരികരിക്കാതിരുന്നതാണോ എന്നറിയില്ല ചന്ദ്രരശ്മികൾ പിന്നീട് ഒളിമിന്നിയില്ല.

കമ്മ്യൂണിസ്റ്റാക്കിയിലെ കേന്ദ്ര കഥാപാത്രമായ പരമുപിള്ളയെ ആദ്യ കാലങ്ങളിൽ അവതരിപ്പിച്ചിരുന്നത് കാമ്പിശേരി കരുണാകരൻ ആയിരുന്നു. അത്യുജ്ജ്വല പ്രകടനമായിരുന്നു അദ്ദേഹത്തിന്റേത്. ഈ നാടകം സമിതി പിന്നീട് സിനിമയാക്കി. പരമുപിള്ളയുടെ റോൾ സത്യനാണ് അഭിനയിച്ചത്. കാമ്പിശേരിയുടെ അഭിനയത്തിന്റെ ഏഴയലത്തുപോലും സത്യൻ എന്ന അഭിനയപ്രതിഭ എത്തിയില്ലെന്ന് എന്നോട് പറഞ്ഞിട്ടുള്ളത് സാക്ഷാൽ തോപ്പിൽ ഭാസിതന്നെയാണ്.

കേരളത്തിലെ പ്രശ്തരായ പല സിനിമാ-നാടക നടീനടന്മാരും കെ.പി.എ.സിയിൽ പരിശീലനം സിദ്ധിച്ചവരായിരുന്നു. ശങ്കരാടി, ഉമ്മർ, സണ്ണി, കവിയൂർ പൊന്നമ്മ, ലളിത, സുധർമ്മ, സുലോചന, ശാന്തകുമാരി, സായ് കുമാർ എന്നിവർ അവരിൽ ചിലർ മാത്രം.

ഈയിടെ കണ്ട ഒരു ടി.വി. അഭിമുഖത്തിൽ കെ.പി.എ.സി.ലളിത പറയുകയുണ്ടായി കെ.പി.എ.സി. എന്ന ആ ടൈറ്റിൽ ഇപ്പോഴും ഒരഭിമാനവും അന്തസുമായിട്ടാണ് അവർ കരുതുന്നതെന്ന്.

അഭിനയ മോഹം പിതാവ് കൊട്ടാരക്കര ശ്രീധരൻനായരുടെ മുമ്പിൽ അവതരിപ്പിച്ചപ്പോൾ, അദ്ദേഹം സായ് കുമാറിനോട് പറഞ്ഞത് ഒരു വർഷം കെ.പി.എ.സിയിൽ പോയി തോപ്പിൽ ഭാസിയോടൊപ്പം നിന്ന് അഭിനയം പരിശീലിക്കാനാണ്. സമിതിയുടെ പാഞ്ചാലി എന്ന നാടകത്തിൽ അർജുനനായി വേഷമിട്ടത് സായ് ആയിരുന്നു.

കാലുമാറുന്നു നാടകത്തിലെ പ്രമേയം തന്നെ അതിലും ശക്തമായി ഉന്നയിച്ചുകൊണ്ട് ഒരു നാടകം അവർ അവതരിപ്പിച്ചു. "വിഷസർപ്പത്തിന് വിളക്കു വെയ്ക്കരുത്". വളരെ വിജയകരമായി ആ നാടകം കേരളമൊട്ടുക്ക് കളിച്ചു. വർഗീയ പിന്തിരിപ്പൻ ശക്തികൾക്കുള്ള എതിർപ്പ് പേരിനോടെയുള്ളൂ എന്നതിന് ഒരുത്തമ ദൃഷ്ടാന്തമായിരുന്നു ആ നാടകം. അതിനെ ആരും എതിർത്തുകണ്ടില്ല.

കുഷ്ഠരോഗികളെ പേപ്പട്ടിയേപ്പോലെ ഭയപ്പെടുകയും സ്വന്തക്കാരും ബന്ധുക്കൾപോലും തിരിഞ്ഞുനോക്കാത്തതുമായ ഒരു കറുത്ത കാലഘട്ടം കേരളത്തിലുണ്ടായിരുന്നു. ഇവരുടെ കഥ വളരെ ഹൃദയസ്പ്രുക്കായി അവതരിപ്പിച്ചുകൊണ്ട്, മലയാളികളുടെ മന:സാക്ഷിയെ ഉണർത്തിയ ഒരു നാടകമായിരുന്നു "അശ്വമേധം". ആ നാടകം കണ്ടിട്ടുള്ള ഒരൊറ്റ സഹൃദയൻ പോലും കണ്ണീർവാർക്കാതിരുന്നിട്ടില്ല. ആ നാടകത്തിലെ നായകനായ ഡോ. തോമസ്സായി കെ.പി. ഉമ്മർ, കെ.പി.എ.സി. സണ്ണി, ഡി.ഫിലിപ്പ് എന്നീ പ്രശസ്തർ അഭിനയിച്ചിട്ടുണ്ട്. കുഷ്ഠരോഗിയായ സരളയായി കെ.പി.എ.സി. സുലോചന, സുധർമ്മ എന്നിവരും അഭിനയിച്ചു.

ഒ . മാധവൻ 

1986ൽ ആ നാടകം വീണ്ടും സമിതി അരങ്ങിലെത്തിക്കുകയുണ്ടായി. ഡോക്റ്റർ ആയി സായ് കുമാറും സരളയായി ശാന്തയും ( തൊടുപുഴ ) ആണ് വേഷമിട്ടത്.  ഈ നാടകവും കെ.പി.എ.സി. സിനിമയാക്കുകയുണ്ടായി. സത്യനും ഷീലയുമാണ് പ്രധാന റോളുകൾ കൈകാര്യം ചെയ്തത്. ആ ചിത്രത്തിലെ അനശ്വരമായ ഒരു ഗാനം മൂളാത്ത മലയാളികൾ പുതിയ തലമുറയിലും വിരളമായിരിക്കും. " ഒരിടത്തു ജനനം, ഒരിടത്തു മരണം........"

അശ്വമേധം രാഷ്ട്രപതി ഭവനിൽ അവതരിപ്പിക്കാനുള്ള ഭാഗ്യം സമിതിക്ക് ലഭിക്കുകയുണ്ടായി. രാഷ്ട്രപതി ഡോ. രാജേന്ദ്രപ്രസാദും പ്രധാനമന്ത്രി പണ്ഡിറ്റ്‌ നെഹ്രുവും അഭിനന്ദിക്കുകയും മുക്തകണ്ഠം പ്രശംസിക്കുകയും ചെയ്തു. സമിതിക്ക് പണ്ഡിറ്റ്‌ജി പ്രത്യേക സമ്മാനവും നല്കി ആദരിക്കുകയുണ്ടായി.

അശ്വമേധം നാടകം ഭൂട്ടാനിൽ ജനങ്ങളുടെ ഹൃദയങ്ങളിൽ ഇടം നേടിയ അനുഭവം നോവലിസ്റ്റായ ജി. ബാലചന്ദ്രൻ മാതൃഭൂമി ആഴ്ചപ്പതിപ്പിൽ എഴുതിയിരുന്നു.

അദ്ദേഹം അവിടെ അദ്ധ്യാപകനായിരുന്നു. ആ സ്ക്കൂളിലെ ഒരു വിദ്യാർഥിനിക്ക് കുഷ്ഠരോഗം പിടിപെട്ടു. ഇക്കാരണം കൊണ്ട് തന്നെ സ്ക്കൂളിലും, നാട്ടിൻപുറത്തും, സ്വന്തം വീട്ടിൽ പോലും അന്യയായിത്തീർന്നു. ഈ സംഭവം ബാലചന്ദ്രന്റെ മനസ്സിനെ വല്ലാതെ മഥിച്ചു .അശ്വമേധം ഭൂട്ടാൻ  ഭാഷയിലേക്ക് അദ്ദേഹം പരിഭാഷപ്പെടുത്തി, തന്റെ സ്കൂളിലെ കുറെ കുട്ടികളെ അഭ്യസിപ്പിച്ച്  വളരെ ആഘോഷപൂർവം നാടകം സ്‌കൂളിൽ അവതരിപ്പിച്ചു.അത്യൽഭുതകരമായ അഭിനയമാണ്  ആ ഹൈസ്കൂൾ വിദ്യാർത്ഥികൾ കാഴ്ചവെച്ചത്.അവർ അഭിനയിക്കുകയായിരുന്നില്ല ജീവിക്കുകതന്നെയായിരുന്നു എന്നാണ് ബാലചന്ദ്രൻ  ലേഖനത്തിൽ പറഞ്ഞിട്ടുള്ളത് .നാടകം കഴിഞ്ഞതോടെ നിലയ്ക്കാത്ത കൈയടിയായിരുന്നു,പലരും പൊട്ടിക്കരഞ്ഞു . കണ്ണീരണിയാത്തവരായി ആരും തന്നെയുണ്ടായിരുന്നില്ല. 

ആ നാടക സംഘത്തോടൊപ്പം അവിടെ കൂടിയിരുന്ന കാണികൾ ഒന്നടങ്കം, ആ ഗ്രാമത്തിലെ ഒരു പ്രാന്തപ്രദേശത്തുള്ള ആശുപത്രിയിൽ പ്രവേശിപ്പിച്ചിരുന്ന ആ കുട്ടിയെ ചെന്നു കാണുകയും അവളെ അവിടെനിന്ന് കൂട്ടിക്കൊണ്ടു പോരുകയും ചെയ്തു.

ഇന്ന് കേരളത്തിൽ നാടക പ്രേമികളും ട്രൂപ്പുകളും നന്നേ കുറവാണ്. നിലവിലുള്ള ട്രൂപ്പുകളാവട്ടെ ചത്തതിനൊക്കുമേ ജീവിചിരിക്കിലും എന്ന സ്ഥിതിയിലുമാണ്. പാക്ഷേ കെ.പി.എ.സിയാകട്ടെ രണ്ടു ട്രൂപ്പുകളുമായി ഈ രംഗത്ത് സജീവമായി നിലനില്ക്കുന്നു. ഭാവനാസമ്പന്നരായ ശിൽപ്പികളുടെ അചഞ്ചലവും കളങ്കമില്ലാത്ത കഠിനപ്രയത്നത്തിന്റെയും നടീനടന്മാരുടെ നിർലോഭമായ സഹകരണത്തിന്റെയും നിശ്ചയദാർഡ്യത്തിന്റെയും ഫലശ്രുതിയാണ് കെ.പി.എ.സിയുടെ വിജയത്തിന്റെ ചാലക ശക്തി.

സമിതിയുടെ വിജയശിൽപികളിൽ പ്രമുഖരായ മൂന്ന്  "സാറന്മാരെ" മറക്കാൻ കഴിയുകയില്ല. അദ്ധ്യാപകർ എന്ന നിലയിൽ പേരെടുത്തവരായിരുന്നില്ല ഈ മൂന്നു പേരും. സമിതിയുടെ പ്രസിഡന്റായി വളരെക്കാലം പ്രവർത്തിച്ച, 26-)o  വയസ്സിൽ തിരു-കൊച്ചി നിയമസഭയിൽ പത്തനാപുരം എം.എൽ.എ. ആയിരുന്ന, പട്ടം, ആർ.ശങ്കർ, പനമ്പള്ളി തുടങ്ങിയ ഗജകേസരികളുടെ ആദരവു നേടിയ രാജൻ സാർ എന്ന എൻ. രാജഗോപാലൻനായർ, ദീർഘകാലം സെക്രട്ടറിയായി പ്രവർത്തിച്ച, മുൻ ഹൌസിംഗ് ബോർഡ് ചെയർമാൻ ഗോപി സാർ എന്ന എം. ഗോപി, കണ്‍വീനറായിരുന്ന മഹാപണ്ഡിതനും, കവിയും നാടകകൃത്തുമായ പോറ്റിസാർ എന്ന കെ. കേശവൻപോറ്റി. ഇവര മൂന്നു പേരും ഇന്ന് ജീവിച്ചിരിപ്പില്ല.

വയലാർ, ദേവരാജൻ, കെ. രാഘവൻ, കെ.ടി.മുഹമ്മദ്‌, ഓ.എൻ.വി., എം.കെ. അർജുനൻ, കണിയാപുരം രാമചന്ദ്രൻ തുടങ്ങിയവർ സമിതിയുമായി സഹകരിച്ചു പ്രവർത്തിച്ചിട്ടുള്ള പ്രമുഖരാണ്.

ഈ നാടക സമിതിയെ മലയാളികളുടെ ഹൃദയത്തോടടുപ്പിച്ച മറ്റുരണ്ടു പേരുകളാണ് ഇരുമെയ്യാണെങ്കിലും ഒരു മനസ്സായി ജീവിച്ചിരുന്ന കാമ്പിശേരി കരുണാകരനും തോപ്പിൽ ഭാസിയും. കൂനന്തറ പരമുവും പൂനാ കേശവനും എന്നപേരിൽ ഒരു ഹാസ്യ നോവൽ കാമ്പിശേരി എഴുതിയിട്ടുണ്ട്. അവരിരുവരുടേയും അനുഭവങ്ങളും പ്രവർത്തനങ്ങളും മണ്ടത്തരങ്ങളുമാണ് ആ രസകരമായ കഥയിലെ പ്രതിപാദ്യവിഷയം.

അത്യാസന്ന നിലയിൽ മരണശയ്യയിൽ കിടക്കുമ്പോൾപോലും കാമ്പിശേരിയുടെ നർമ്മബോധത്തിന് അല്പം പോലും ക്ലാവ് പിടിച്ചിരുന്നില്ല. അദ്ദേഹം തിരുവനന്തപുരം മെഡിക്കൽ കോളേജിൽ കിടക്കുകയാണ്. പിറ്റേന്ന് രാവിലെ പരിശോധനക്ക് ഒരല്പം മലം എടുത്തുവെക്കണമെന്നു നേഴ്സ് ഭാര്യയോട് പറഞ്ഞിരുന്നു. പണ്ട് ഒരു കൊങ്ങിണി പറഞ്ഞപോലെയായി സ്ഥിതി. "പണ്ടാരം വീണുകിട്ടേണ്ടേ .."? ആവുന്ന പണി പതിനെട്ടും പയറ്റിയിട്ടും ഫലം നാസ്തി. കാമ്പിശേരി ഭാര്യയെ സമാധാനിപ്പിച്ചു:

വിഷമിക്കേണ്ടാ പ്രേമേ, അടുത്ത മുറിയിൽനിന്ന് ഒരല്പം വാങ്ങിച്ചു കൊടുക്ക്‌, നമുക്കുണ്ടാവുമ്പോൾ അവർക്കങ്ങു തിരിച്ചു കൊടുക്കാം-.

പ്രവർത്തിച്ച മേഖലകളിലെല്ലാം മായാത്ത വ്യക്തിമുദ്ര പതിപ്പിച്ച അസാമാന്യ പ്രതിഭയായിരുന്നല്ലോ തോപ്പിൽ ഭാസി. അദ്ദേഹത്തെക്കുറിച്ച് എഴുതാൻ തുടങ്ങിയാൽ, കൊച്ചീക്കൽ ബാലകൃഷ്ണൻ തമ്പി പറഞ്ഞപോലെ ചെറുകഥയല്ല നോവൽ എഴുതേണ്ടി വന്നുപോകും. അദ്ദേഹത്തിന്റെ ഒളിവിലെ ഓർമ്മകൾ എന്ന ഒരൊറ്റ കൃതി മതിയല്ലോ സഹൃദയരുടെ മനസ്സില് സ്ഥിരപ്രതിഷ്ഠ നേടാൻ.

എമ്മെൻ, റ്റി.വി., ശങ്കരനാരായണൻ തമ്പി, പി.കെ.വി., പി.എസ്. ശ്രീനിവാസൻ തുടങ്ങിയ കമ്മ്യൂണിസ്റ്റ് നേതാക്കൾ വിലപ്പെട്ട സംഭാവനകൾ ചെയ്തിട്ടുള്ളവരാണ്. പി.കെ.വി. കുറച്ചുകാലം പ്രസിഡന്റായും പ്രവർത്തിച്ചിട്ടുണ്ട്.

പാർടി പിളർന്നതിന് ശേഷമാണ് മൂലധനം എന്ന നാടകം സമിതി ഡൽഹിയിൽ അവതരിപ്പിക്കുകയുണ്ടായി. കാണികളുടെ കൂട്ടത്തിൽ സാക്ഷാൽ എ.കെ.ജിയുമുണ്ടായിരുന്നു. അതിലെ തലപ്പുലയന്റെ " പെർഫോർമൻസ് " കണ്ടിട്ട് എ.കെ.ജി. അടുത്തിരുന്ന എസ്. കുമാരനോട്‌ ചോദിച്ചു., ആരാടോ ആ പുലയന്റെ പാർട്ടെടുക്കുന്നത്...?

തോപ്പിൽ കൃഷ്ണപിള്ളയെന്ന് എസ്. പറഞ്ഞു.

ങേ....നമ്മുടെ കൃഷ്ണപിള്ളയോ..! എ.കെ.ജിക്ക് അത്ഭുതം.

പാർടികൾ ബദ്ധശത്രുതയിൽ കഴിഞ്ഞിരുന്ന അവസരങ്ങളിൽ പോലും കായംകുളം വഴി കാറിൽ പോവുകയാണെങ്കിൽ അരമണിക്കൂറെങ്കിലും എ.കെ.ജി.,  കെ.പി.എ.സിയിൽ ചെലവഴിക്കുമായിരുന്നു.

എമ്മെൻ മന്ത്രിയായിരിക്കുമ്പോൾ ഒരു ചെറിയ അറ്റാക്ക് വന്നതിനെത്തുടർന്ന് കൊല്ലം ബൻസിഗർ ആശുപത്രിയില ചികിത്സയിൽ കഴിയുകയായിരുന്നു. ഒരു നാടകാവതരണവുമായി ബന്ധപ്പെട്ട് സമിതി കൊല്ലത്തെത്തി. എമ്മനെ പോയിക്കാണണമെന്ന് ജോണ്‍സണ്‍ അഭിപ്രായപ്പെട്ടു. കെ.പി.എ.സിയുടെ പഴയ ഫാർഗോ ബസ്സ്‌ നേരെ ബൻസിഗറിലേക്ക്‌. എല്ലാവരെയും ഒന്നിച്ചു കണ്ടപ്പോൾ എമ്മന് സന്തോഷമായി. അദ്ദേഹം കെ.പി.എ.സി.ലളിതയോട് പറഞ്ഞു:

എടീ, നീയൊരു പാട്ടൊന്നു പാടിക്കേ...., കേൾക്കട്ടെ..!

ആശുപത്രിയല്ലേ എന്നൊക്കെയുള്ള ഒഴിവുകഴിവുകൾ എമ്മെനുണ്ടോ വകവെച്ചു കൊടുക്കുന്നു. അതൊന്നും സാരമില്ല, നീ പാട്, എന്നായി എമ്മൻ.

"തലയ്ക്കു മീതേ ശൂന്യാകാശം, താഴേ മരുഭൂമി ...." എന്ന കെ.പി.എ.സിയുടെ ഒരു ഗാനം തന്നെ ലളിത അതി മനോഹരമായി പാടി.

പാട്ടു തീർന്നതും കയ്യടിച്ച് പൊട്ടിച്ചിരിച്ചുകൊണ്ട് എമ്മെൻ പറഞ്ഞു, ഭേഷ്, വളരെ നന്നായിട്ടുണ്ട്. സന്ദർഭോചിതമായി പാടാനും നിനക്കറിയാമല്ലോ...?

ആ പാട്ടിന്റെ ചരണത്തിലെ ഒരു വരിയിങ്ങനെയാണ്, - "മരണം വാതിൽക്കൽ ഒരുനാൾ, മഞ്ചലുമായ് വന്നു നിൽക്കുമ്പോൾ...."

ഗായകനായിരുന്ന കെ.എസ്.ജോർജ്ജിന്റെ അന്ത്യകാലത്ത് കെ.പി.എ.സി. തിരിഞ്ഞുനോക്കിയില്ല എന്നൊരാരോപണം മന:പൂർവ്വം കൊലാഹലമുണ്ടാക്കാൻ ചില ദുഷ്ട ബുദ്ധികൾ ശ്രമിക്കുകയുണ്ടായി. അറിഞ്ഞോ അറിയാതെയോ ജോർജ്ജിന്റെ കുടുംബാംഗങ്ങളും ആ പൊറാട്ടു നാടകത്തിൽ പങ്കാളികളായി.

കെ.പി.എ.സിയിൽ നിന്ന് വിട്ടുപോയിട്ടും ജോർജ്ജിന് സമിതിയുടെ കഴിവനുസരിച്ച് സാമ്പത്തിക സഹായം ചെയ്യുമായിരുന്നു. പക്ഷെ പണത്തിന് അത്യാർത്തിപൂണ്ട് കമ്മ്യൂണിസ്റ്റ് വിരുദ്ധരുടെ കൈകളിൽ വെറുമൊരു പാവയായി പാർടിയെയും കെ.പി.എ.സിയേയും അധിക്ഷേപിക്കാൻ അയാൾക്കൊരുളുപ്പും തോന്നിയില്ല. തെരഞ്ഞെടുപ്പു യോഗങ്ങളിൽ പി.കെ.വിക്കും ശ്രീനിവാസനും എതിരേപോലും പഴയ നാടക ഗാനങ്ങളുടെ പാരഡിപ്പാട്ടും പാടി ഒരു ബഫൂണായി അധ:പതിക്കാനും ആ വിപ്ലവ ഗായകന് യാതൊരു മനസ്സാക്ഷിക്കുത്തുമുണ്ടായില്ല.

1986 ൽ അമേരിക്ക, യൂറോപ്പ് തുടങ്ങിയയിടങ്ങളിൽ നാടകം അവതരിപ്പിച്ചിട്ട് കെ.പി.എ.സി. യു.എ.ഇ. യിൽ എത്തി. അവിടെ 7 ദിവസത്തെ നാടക പരിപാടി ആസൂത്രണം ചെയ്തത് എന്റെ രണ്ടു മിത്രങ്ങൾ ആയിരുന്നു. കുരുവിളയും രവിച്ചേട്ടനും. ( സന്തോഷ്‌ ശിവന്റെ ഭാര്യാ സഹോദരനാണ് രവിച്ചേട്ടൻ ) ഞാനന്ന് ഷാർജയിലെ കല എന്നൊരു സംഘടനയുടെ പ്രസിഡണ്ടായിരുന്നു സമിതിയോടൊപ്പം തോപ്പിൽ ഭാസിയും എം.ഗോപിയുമുണ്ട്. രണ്ടുപേരും വ്യക്തിപരമായി വളരെയടുപ്പം ഉള്ളവർ.

എന്റെ പിതാവിന്റെ വളരെയടുത്ത സുഹൃത്തായിരുന്നു എം.ഗോപി. സമപ്രായക്കാർ എന്ന് പറഞ്ഞാൽ പോരാ, രണ്ടുപേരും 104 മകരത്തിലെ മകം നക്ഷത്രക്കാർ.

തോപ്പിൽ ഭാസിയുടെ ഭാര്യ അമ്മിണിയമ്മ എന്റെ അമ്മവീടിന്റെ അയല്പക്കക്കാരി. ഇവർ രണ്ടുപേരും ഭാസിയമ്മാവൻ, ഗോപിയമ്മാവൻ, കുഞ്ഞുന്നാളുമുതൽ എനിക്കറിയാവുന്നവർ.

ഇവരെല്ലാവരും അവിടെയുള്ള അവസരത്തിലാണ് എന്റെ മൂത്തമകൻ ജിഷ്ണു ജനിക്കുന്നത്. കുരുവിളയുടെ ഗസ്റ്റ് ഹൌസിൽ ഭാസിയമ്മാവന്റെ മുറിയിലിരിക്കുമ്പോൾ ആണ് ടെലഗ്രാം വിവരം ഓഫീസ്സിൽ നിന്ന് അറിയിച്ചത്. ഞാൻ പോയി കുറച്ചു ലഡ്ഡു വാങ്ങിക്കൊണ്ടു വന്നു. പഞ്ചാര പോകാൻ പറ എന്നുപറഞ്ഞ് ഭാസിയമ്മാവൻ ഒന്നുരണ്ടെണ്ണം എടുത്തു കഴിച്ചു. മൂന്നാമത്തേതുയർന്നപ്പോൾ, ഭഗവാന്റെ കൈയ്യിൽ രുഗ്മിണീദേവി കടന്നുപിടിച്ചപോലെ ഗിപിയമ്മാവൻ കയറി പിടിച്ചുകളഞ്ഞു.

ലഡ്ഡുവിലും ജിലേബിയിലും ഒതുങ്ങാൻ സമിതിയിലെ മറ്റുള്ളവർ, കൃഷ്ണപിള്ളച്ചേട്ടൻ, അസീസ്, ജോണ്‍സണ്‍, സാബു, രവി, സായ് കുമാർ എന്നിവരൊന്നും സമ്മതിച്ചില്ല. അവസാനം ചെറിയ തോതിലുള്ള വാട്ടർബറീസ് പരിപാടി സംഘടിപ്പിക്കേണ്ടി വന്നു. ആ സോദ്ദേശ പരിപാടിയിലും കുറച്ചു നേരം ഭാസിയംമാവനും പങ്കുകൊണ്ടു.

നാട്ടിൽ വരമ്പോൾ മകനെ കൊണ്ടുചെന്നു കാണിക്കണമെന്ന് ഭാസിയമ്മാവൻ പറഞ്ഞിരുന്നു. അവധിക്ക് നാട്ടിൽ എത്തിയപ്പോൾ ഒരുദിവസം ഞാനും ഭാര്യയും കൂടി മകനെയും കൊണ്ട് വള്ളികുന്നത്തിനു പോയി. അദ്ദേഹം ഒരുപാടുനേരം അവനെ മടിയിലിരുത്തി താലോലിക്കുകയുണ്ടായി. അവൻ കുറച്ച്കൂടി പ്രായമായതിനുശേഷം തിരുവനന്തപുരത്തേക്ക് പോകുന്ന വഴി ഒരിക്കൽ കെ.പി.എ.സിയിൽ കയറി. ഭാസിയമ്മാവൻ അവിടെയുണ്ടായിരുന്നു. പുതിയ നാടകത്തിന്റെ റിഹേർസൽ നടക്കുന്നതുകൊണ്ട് നടീനടന്മാർ എല്ലാവരും അവിടെയുണ്ട്. ജോണ്‍സണ്‍ അസീസ്‌, കൃഷ്ണപിള്ളച്ചേട്ടൻ, രാജമ്മച്ചേച്ചി, ശാന്ത, പ്രസന്ന ( സായ് കുമാറിന്റെ ഭാര്യ) റിഹേഴ്സൽ നിർത്തിവെച്ച് മകനെ കാണിച്ചു കൊടുത്തു, ആ കാർണവർ.

ഒരു കേരള ബന്ദ് ദിവസമാണ് ഭാസിയമ്മാവൻ മരിച്ചത്. അദ്ദേഹത്തിന്റെ ഒരു ബന്ധു ജയൻ ചേട്ടനും ഞാനും കൂടി മാന്നാറിൽ നിന്ന് സൈക്കിളിലാണ് വള്ളികുന്നത്തിന് പോയത്.

കഴിഞ്ഞ ഡിസംബറിൽ ജിഷ്ണുവിന്റെ കല്യാണത്തിന്, സുകുമാരപിള്ള സാറിനെ ക്ഷണിക്കാൻ ഞാൻ കെ.പി.എ.സിയിൽ പോയിരുന്നു. പഴയ മുഖങ്ങൾ ആരും തന്നെയില്ല. പക്ഷെ സജീവമായിത്തന്നെ നാടകരംഗത്ത് കെ.പി.എ.സി. നിലനില്ക്കുന്നു. അവിടെ നിൽക്കുമ്പോൾ എന്തെന്നില്ലാത്ത ഒരഭിമാനം തോന്നി - പറഞ്ഞറിയിക്കാനാവാത്ത സന്തോഷവും.

തികച്ചും വേദനാജനകമായ ഒരു സംഭവം കൂടി പരാമർശിക്കാതെപോകുന്നത്, മണ്മറഞ്ഞുപോയ മഹാന്മാരായ സമിതിയുടെ സൃഷ്ടാക്കളോട് ചെയ്യുന്ന അപരാധമായിരിക്കും എന്നുഞാൻ കരുതുന്നു.

നാലഞ്ചു കൊല്ലങ്ങൾക്ക് മുമ്പ് തോപ്പിൽ ഭാസിയുടെ മകനും ഒരടുത്ത ബന്ധുവും കൂടി, കെ.പി.എ.സിയോട് ഒരു നിഴൽയുദ്ധം പ്രഖ്യാപിച്ചുകൊണ്ട് ആ നാടകാചാര്യന്റെ നാമധേയത്തിൽ ഒരു നാടക സമിതി രൂപീകരിച്ചു. ആസ്ഥാനം കായംകുളത്ത് കെ.പി.എ.സിയുടെ സമീപത്തു തന്നെ.

തിരുവനന്തപുരത്തുവെച്ച് ആഘോഷപൂർവ്വം ഉൽഘാടനമഹാമഹവും കൊണ്ടാടി. പിണറായി വിജയനായിരുന്നു ഉൽഘാടകൻ. കെ.പി.എ.സിയുമായുള്ള മത്സരത്തിന്  സി.പി.എം. സഹകരിക്കുമെന്ന തെറ്റിദ്ധാരണയാണ് അങ്ങനെയൊരു ഉദ്യമത്തിന് ഈ മന്ദ:കവിയശ:പ്രാർഥികളെ പ്രേരിപ്പിച്ചത്. ചുരുക്കം പറഞ്ഞാൽ ഉൽഘാടനസമ്മേളനവും സമാപനസമ്മേളനവും ഒരേ വേദിയിൽവെച്ചു തന്നെ നടന്നു.

ഇങ്ങനെയുള്ള ഭോഷന്മാരെ ഉദ്ദേശിച്ച് മഹാഭാരതം കർണ്ണപർവ്വത്തിൽ, കർണ്ണന്റെ അഹന്തയെ പരിഹസിച്ച് ശല്യർ ഒരു കാകന്റെ കഥ പറയുന്നുണ്ട്. എഴുത്തച്ഛൻ ആ ഭാഗം ഇങ്ങനെയാണ് വർണ്ണിച്ചിരിക്കുന്നത്.

ദിനന്തോറുമെച്ചിൽ കൊടുത്തൊരു വൈശ്യ
തനയന്മാരായ കുമാരന്മാർമുന്നം
വളർത്താരെന്നതു നിമിത്തമായ്കാകൻ
പുളച്ചഹങ്കരിച്ചരയന്നങ്ങളെ
മദത്തോടു ചെന്നു വിളിച്ചിതാഴിയെക്കട-
ക്കണം പറന്നിനി നാമെല്ലാരും ....

ആ കാക്കയ്ക്ക് സംഭവിച്ച ദുര്യോഗം തന്നെ ആ സമിതിക്കും സംഭവിച്ചു എന്ന് പറയേണ്ടതില്ലല്ലോ?

കുഴഞ്ഞു വെള്ളത്തിൽ പിടഞ്ഞു വീണുടൻ
കഴിഞ്ഞു കാകൻ തന്നഹങ്കാരമെല

ബഹുമാനിയാ ഞാൻ ആരെയും തൃണവൽ......

 ഇങ്ങനെ ഒരാൾ യഥാർത്ഥത്തിൽ ജീവിച്ചിരുന്നോ എന്ന്  സംശയം തോന്നും ഇത്  വായിക്കുമ്പോൾ. പക്ഷെ തികച്ചും സത്യസന്ധമാണ്‌  ഇതിൽ പ്രതിപാദിച്ചിരിക്കുന്ന കാര്യങ്ങൾ.
ചവറ ശങ്കരമംഗലത്ത് ശങ്കരൻതമ്പിയുടെ അനുജൻ പത്മനാഭപിള്ള കുന്നത്തൂർ തഹശീൽ മജിസ്ട്രേട്ടായി ഭരണം നടത്തിവരികയാണ്. അതിബുദ്ധിമാൻ മാത്രമല്ല രാജബന്ധം കൊണ്ട് അത്യന്താധികാരിയുമായിരുന്നു അദ്ദേഹം. അദ്ദേഹത്തിന് തോന്നിയതുപോലെയാണ് ഭരണം. കച്ചേരിയിൽ പോവുകയോ കേസുകൾ കേൾക്കുകയോ ഒന്നുമില്ല. ഇനി കേസുമായി ആരെങ്കിലും മജിസ്ട്രേട്ടിനെ കാണാനെത്തിയെന്നിരിക്കട്ടെ, " എടാ! പോക്കിരി പുലിയാടിമക്കളെ ഇത് കണ്ടാൽ തോന്നുമല്ലോടാ, എനിക്കിതാ ജോലിയെന്ന്."

പിന്നെ എന്താണ് ജോലിയെന്ന് ആർക്കെങ്കിലും ചോദിക്കാൻ തോന്നുമോ? ശ്രീമൂലം തിരുമനസ്സിലെ പ്രഭാപൂരം അതിനു സമ്മതിക്കുമോ?

ഒരിക്കൽ പത്മനാഭപിള്ളയുടെ കോടതിയിൽ ഒരു പ്രതിക്കുവേണ്ടി, അദ്ദേഹത്തിന് തീരെ കണ്ടുകൂടാത്ത ഒരു വക്കീൽ ഹാജരായി. വക്കീലിനെ അവഗണിച്ച് മജി. പ്രതിയോട് ചോദിച്ചു:

" എടാ പ്രതീ, നിനക്ക് വേണ്ടപ്പെട്ടവരാരുമില്ലേടാ, ഈ മരങ്ങോടൻ വക്കീലിന്  നീ ആല്ലാതെ വേറാരെങ്കിലും കേസുകൊടുക്കുമോടാ ..?"

പത്മനാഭപിള്ളയദ്ദേഹത്തിന്റെ കഥകളിൽ സൂപ്പർ കഥയാണ്  ഇനി പറയുന്നത്.

ഒരിക്കൽ കേരള ഗണകസമാജത്തിന്റെ വാർഷികയോഗം അടൂരിൽ വെച്ച് നടത്താൻ അതിന്റെ പ്രവർത്തകർ തീരുമാനിച്ചു. ശാസ്താംകോട്ടയിലുള്ള ഒരു പത്മനാഭൻ ജോൽസ്യനായിരുന്നു ആ സംഘടനയുടെ ജനറൽ സെക്രട്ടറി. ജോൽസ്യനൊരാഗ്രഹം, ശങ്കരമംഗലത്തെ തമ്പുരാനെ അധ്യക്ഷനായി വേണം. ജോത്സ്യൻ പ്രമുഖ സാഹിത്യകാരനായ ഇ.വി.കൃഷ്ണപിള്ളയെ സമീപിച്ചു. ഇ.വി. മജി.ന്റെ അടുത്ത ബന്ധുവും സന്തതസഹാചാരിയുമാണെന്ന് ജോല്സ്യർക്കറിയാം. വേണ്ടാവേലക്കുള്ള പുറപ്പാടാണ് കണിയാരുടെതെന്നു ഇ.വി.ക്ക് മനസ്സിലായി. സംഭവത്തിന്റെ " പരിണാമഗുസ്തി" എന്താണെന്നറിയണമല്ലോ, ഇ.വി. സംഗതി ഏറ്റു. ഒരു നിശ്ചിത ദിവസം മജി.ന്റെ ബംഗ്ലാവിൽ എത്താൻ ഗണകരെ ചട്ടംകെട്ടി.

ഇ.വി. മജി.യോടൊപ്പം അദ്ദേഹത്തിന്റെ വസതിയിൽ കുശലം പറഞ്ഞിരിക്കുമ്പോഴാണ് കാര്യദർശി താണുവീണു തൊഴുത് അവിടേക്ക് കയറിവരുന്നത്. 

" ആരാടാ അത്...?" അദ്ദേഹം ഇ.വി.യോട് ചോദിച്ചു. 

" അത് ആൾ കേരളാ ഗണകസമാജം ജനറൽ സെക്രട്ടറി മിസ്റ്റർ. പത്മനാഭൻ ജോത്സ്യർ..."

മജി: " ആരാ, ആരാ, എന്തവാടാ ..?"

ഇ.വി. : " ഒരു പാവം കണിയാരാ...."

മജി : " അവനെന്തൊക്കെയാണെന്നാടാ നീ പറഞ്ഞത്....?"

ഇ.വി. : ഇവർക്കൊരു സമാജമുണ്ട്, ഈ കണിയാനാ അതിന്റെ കാര്യദർശി .."

മജി. ( കാര്യദർശിയോട് ) " എന്തവാടാ ഇത്, കണിയാന്മാർക്കുമായോടാ സംഘോം സമാജോമൊക്കെ, ആര് പറഞ്ഞിട്ടാടാ ഇതൊക്കെ..." പാവം കണിയാർ. നിന്ന് ഉരുകുകയാണ്.

ഇ.വി. ഒരുപാട്  നിർബ്ബന്ധിച്ച ശേഷമാണ്   അദ്ധ്യക്ഷനാവാൻ പത്മനാഭപിള്ളയദ്യം സമ്മതിച്ചത്. യോഗ ദിവസം, പ്ലാറ്റ്ഫോമിന്റെ മദ്ധ്യത്തെ കസേരയിൽ അദ്ദേഹവും ഇടവും വലവും മുൻസിഫും അടൂർ ഹൈസ്ക്കൂൾ ഹെഡ്മാസ്റ്ററും ഇരുന്നു. ഒരു കസേര ഒഴിച്ചിട്ടിരിക്കുകയാണ്. സമാജത്തിന്റെ സ്ഥിരം അദ്ധ്യക്ഷന് ഇരിക്കാനാണത്.

" സമാജത്തിന്റെ പ്രസിഡന്റ് പാഴൂർ പടിപ്പുരയിൽ കൊച്ചുരാമൻ വൈദ്യനെ ഒഴിഞ്ഞ കസേരയിൽ ഇരുത്തണമെന്നാണ് ഗണകസമാജത്തിന്റെ ആഗ്രഹം....." ഇ.വി. മജി.യോട് പറഞ്ഞു. 

അദ്ധ്യക്ഷന്റെ അത്യുച്ചത്തിലുള്ള പ്രതികരണം.  " ഈ നാണം കെട്ട പണിക്ക് വന്നതുമല്ല, ഒരു പരട്ട കണിയാനെ എന്റൊപ്പം ഇരുത്താനോ....?"  വേദിയിലിരുന്ന സ്ഥിരാധ്യക്ഷനെ നോക്കി - " എടോ, മൂത്തകണിയാരെ, തനിക്ക് എന്റൊപ്പം കയറിയിരിക്കണോടോ ...?"

" വേണ്ടായേ, വേണ്ടായേ "

" ങാ, താൻ മര്യാദക്കാരനാ, എവിടാടാ മറ്റേ കഴുവേറി...?"  കാര്യദർശി അടൂർ താലൂക്കിൽ നിന്നു തന്നെ നിഷ്ക്രമിച്ചു എന്ന് പറയേണ്ടതില്ലല്ലോ?

ആ യോഗത്തിലെ മറ്റൊരു പ്രാസംഗികൻ ആയിരുന്നു, എം.എൽ.സിയും പത്രാധിപരുമൊക്കെ ആയിരുന്ന കൈതപ്പുഴ ഗോവിന്ദപ്പിള്ള. ഗണകസമുദായം കോഴി വെട്ടരുത്, കോലം തുള്ളരുത്, മന്ത്രവാദം നടത്തരുത് എന്നൊക്കെ കൈതപ്പുഴ പ്രസംഗത്തിൽ ഗണകന്മാരെ ഗുണദോഷിച്ചു. 

അതിഗംഭീരമായിരുന്നു പത്മനാഭപിള്ളയദ്യത്തിന്റെ ഉപസംഹാര പ്രസംഗം. " എടാ കണിയാന്മാരേ, എന്തവാടാ ഈ ഗോവിന്ദപിള്ള പറഞ്ഞത്. നീയൊന്നും മന്ത്രവാദം ചെയ്യരുത്, കോഴിയെ വെട്ടരുത് ..... കൊള്ളാം, പിന്നെ നിനക്കൊക്കെ അവന്റെ തന്ത ചെലവിന്   തരുമോടാ...?"

" എന്റെ ബഹുമാന്യ സ്നേഹിതൻ ശ്രീ ഗോവിന്ദപിള്ളഅവർകൾ ഇവിടെ പ്രകടിപ്പിച്ച അഭിപ്രായത്തോട് എനിക്ക് വിയോജിപ്പുണ്ടെന്ന് ഖേദപൂർവ്വം പ്രസ്താവിച്ചു കൊള്ളുന്നു," എന്നാണല്ലോ ഇതിനർത്ഥം.

പിന്നീടദ്ദേഹം കൊല്ലം ഡിവിഷണൽ പേഷ്ക്കാരായി. ഒരു സാധു പ്രവർത്ത്യാരെ ( വില്ലേജ്ഓഫീസർ) എന്തോ നിസാര കുറ്റത്തിന് ചെങ്കോട്ടക്ക് സ്ഥലം മാറ്റി. അന്ന് ചെങ്കോട്ട കൊല്ലം ഡിവിഷനിൽപ്പെട്ട പ്രദേശമാണ്. പേഷ്കാർ പെൻഷനായതിനു ശേഷം ഈ പ്രവർത്ത്യാരെ ഒരു വിവാഹ സ്ഥലത്തു വെച്ച് കാണാനിടയായി. അദ്ദേഹം ചോദിച്ചു....

" എന്താടോ നാണുപിള്ളേ, സുഖമാണോ....?"

" എന്ത് പറയാനാ അങ്ങുന്നേ, ആകപ്പാടെ കഷ്ടപ്പാടാണേ..ഭാഷേം അറിയത്തില്ല, ആഹാരോം പിടിക്കുന്നില്ലേ..."

" അയ്യോ, നാണുപിള്ളേ, ഇനി ഞാൻ വിചാരിച്ചാൽ ഒന്നും ചെയ്യാൻ പറ്റില്ലടോ, ഞാൻ പെൻഷനായി...."

നാണുപിള്ള: " അതു തന്നാടാ മുതു കഴുവേറീടെ മോനെ എനിക്ക് പറയാനുള്ളത്..നീ വിചാരിച്ചാൽ ഇനി എന്നെ എന്തോ ചെയ്യാനാ..."
ഇത്രയൊക്കെ പറഞ്ഞ സ്ഥിതിക്ക്  ഒരു സത്യം കൂടി വെളിപ്പെടുത്തിയേക്കാം. സ്മര്യപുരുഷൻ എന്റെ നടുവത്തെ അമ്മാവിയുടെ അമ്മാവൻ ആണ്.